Priyadarshi: ఆసక్తిని పెంచుతున్న ప్రియదర్శి ‘సారంగపాణి జాతకం’ మూవీ ఫస్ట్ లుక్ పోస్టర్

దిశ, సినిమా: శ్రీదేవి మూవీస్ అధినేత శివలెంక కృష్ణప్రసాద్, దర్శకుడు మోహనకృష్ణ ఇంద్రగంటి కాంబినేషన్ లో ఇదివరకే జెంటిల్‌మన్, సమ్మోహనం లాంటి చక్కటి విజయవంతమైన సినిమాలు వచ్చాయి. మరోసారి వారిద్దరి కలయికలో ప్రియదర్శి కథానాయకుడిగా మరో చిత్రం తెరకెక్కనుంది. ఈ సినిమాకు 'సారంగపాణి జాతకం' అనే టైటిల్ ఖరారు చేసి, ఫస్ట్ లుక్‌ను కూడా విడుదల చేశారు.

ఈ సందర్భంగా.. దర్శకుడు మోహనకృష్ణ ఇంద్రగంటి మాట్లాడుతూ.. ''నమ్మకం మనిషికి బలాన్ని ఇస్తుంది. కానీ, మూఢ నమ్మకం బుద్ధిమంతుడిని కూడా బలహీనుడిని చేసి నవ్వుల పాలు చేస్తుంది. అలా నవ్వుల పాలైన ఓ మధ్య తరగతి మంచి అబ్బాయి కథే 'సారంగపాణి జాతకం'. తన నమ్మకం, తను ఇష్టపడిన అమ్మాయి ప్రేమ మధ్య కొట్టుమిట్టాడి రెండిటికి చెడ్డ రేవడ అయిపోయాడా? లేదా బయట పడ్డాడా? అనే కథాంశాన్ని ఉత్కంఠభరితంగా కడుపుబ్బా నవ్వించే హాస్యంతో చెప్పాం. హీరో పాత్రలో భావోద్వేగాలను, వినోదాన్ని ప్రియదర్శి తనదైన శైలిలో అద్భుతంగా పండించగా... అచ్చ తెలుగు అమ్మాయి రూప కడువయూర్ తన అభినయంతో కట్టి పడేస్తుంది. సకుటుంబ సపరివార సమేతంగా హాయిగా చూడగలిగే ఒక హాస్య సంబరం ఈ సినిమా’’ అని చెప్పుకొచ్చాడు.

(Video Link Credits to preyadarshi pulikonda Instagram Channel)