నాని ‘కోర్ట్‌’లో హీరోగా ప్రియదర్శి.. ఆసక్తికరంగా మోషన్ పోస్టర్‌

దిశ, సినిమా: టాలీవుడ్ నేచురల్ స్టార్ నాని ఓ వైపు సినిమాలు చేస్తూనే మరో వైపు నిర్మాతగా మారి చిత్రాలు తెరకెక్కిస్తున్న విషయం తెలిసిందే. తాజాగా, నాని నిర్మాణ సంస్థ నుంచి ఓ కొత్త మూవీ రాబోతున్నట్లు అధికారిక ప్రకటన విడుదల చేశారు. ఇందులో బలగం నటుడు ప్రియదర్శి హీరోగా నటిస్తుండగా.. రామ్ జగదీశ్ దర్శకత్వం వహిస్తున్నాడు. నేడు ఈ మూవీకి సంబంధించిన టైటిల్, మోషన్ పోస్టర్‌ను మేకర్స్ విడుదల చేసి అంచనాలను పెంచేశారు.

కోర్ట్ అనే టైటిల్ పెట్టినట్లు వెల్లడించారు. అలాగే కోర్ట్ బోనులో న్యాయ దేవత విగ్రహం ఉన్న ఫొటో షేర్ చేశారు. అంతేకాకుండా మోషన్ పోస్టర్‌కు సంబంధించిన వీడియోను కూడా నెట్టింట పెట్టారు. ప్రజెంట్ దీనిపై అందరిలో ఆసక్తి నెలకొంది. ఇక ఈ వీడియో చూసిన వారంతా ఈ సినిమా ఎప్పుడెప్పుడు వస్తుందా అని ఎదురుచూస్తున్నారు. కాగా, నాని హీరోగా నటించిన ‘సరిపోదా శనివారం’ ఆగస్టు 29న విడుదలైన సంగతి తెలిసిందే. ఈ సినిమా భారీ అంచనాల నడుమ విడుదలైనప్పటికీ ప్రేక్షకులను మెప్పించలేకపోయింది. ప్రజెంట్ నేచురల్ స్టార్ నాని దసరా-2 చేయబోతున్నట్లు తెలుస్తోంది.