నిర్మాత అశ్వనీదత్‌కు మెగాస్టార్ అదిరిపోయే గిఫ్ట్.. ఎమోషనల్ పోస్ట్ వైరల్

దిశ, సినిమా: బి గోపాల్, మెగాస్టార్ చిరంజీవి కాంబోలో వచ్చిన ఇంద్ర చిత్రం బ్లాక్ బస్టర్ హిట్ అందుకున్న విషయం తెలిసిందే. అయితే దీనిని వైజయంతీ మూవీస్ బ్యానర్‌పై స్టార్ నిర్మాత అశ్వనీదత్ తెరకెక్కించగా.. సోనాలి బింద్రే, ఆర్తి అగర్వాల్ హీరోయిన్లుగా నటించారు. ఇటీవల ఈ మూవీ చిరంజీవి పుట్టిన రోజు సందర్భంగా రీ రిలీజ్ అయిన సంగతి తెలిసిందే. ఆగస్టు 22న విడుదలైన ఈ చిత్రం రీరిలీజ్‌లో సరికొత్త రికార్డులు సాధిస్తూ థియేటర్స్‌లో దూసుకుపోతుంది.

ఈ క్రమంలో.. తాజాగా, ఇంద్రకు పని చేసిన టీమ్ అంతా చిరంజీవిని కలిశారు. అయితే చిరు వారిని సత్కరించి పలు విషయాలు మాట్లాడారు. ఇక నిర్మాతగా వ్యవహరించిన అశ్వనీదత్‌కు ఓ అద్భుతమైన బహుమతిని కూడా ఇచ్చారు. ఈ విషయాన్ని ఆయన ట్విట్టర్ వేదికగా తెలుపుతూ ఎమోషనల్ పోస్ట్ పెట్టాడు. ‘‘ఈ విజయ శంఖాన్ని కానుకగా నాకిచ్ఛారు మీరు. కానీ ఇంద్రుడై, దేవేంద్రుడై పూరించింది మాత్రం ముమ్మాటికీ మీరే. ఈ కానుక అమూల్యం. ఈ జ్ఞాపకం అపురూపం. అదెప్పటికీ నా గుండెల్లో పదిలం’’ అని రాసుకొచ్చాడు.