Kannappa: కన్నప్ప నుంచి అవ్రామ్ లుక్ రిలీజ్.. మాటలు రావట్లేదంటూ మంచు విష్ణు ఎమోషనల్ పోస్ట్

దిశ, సినిమా: టాలీవుడ్ హీరో మంచు విష్ణు డ్రీమ్ ప్రాజెక్ట్‌గా తెరకెక్కుతున్న భారీ బడ్జెట్ చిత్రం ‘కన్నప్ప’. అయితే ఇందులో సౌత్, నార్త్‌లో ఉన్న బడా స్టార్స్‌ను భాగం చేశాడు. అంతేకాకుండా మంచు విష్ణు కూడా ఓ కీలక పాత్రలో నటిస్తున్నాడు. అలాగే ఇందులో పాన్ ఇండియా స్టార్ ప్రభాస్, మోహన్ లాల్, శరత్ కుమార్, బ్రహ్మానందం, ప్రీతి ముకుందన్, కాజల్ అగర్వాల్, మధుబాల, మోహన్ బాబు, దేవరాజ్ వంటి నటీనటులు నటిస్తున్నారు. అయితే ఈ చిత్రాన్ని ముఖేష్ కుమార్ సింగ్ దర్శకత్వం వహిస్తుండగా.. అవా ఎంటర్‌టైన్మెంట్, 24 ఫ్రేమ్స్ ఫ్యాక్టరీ బ్యానర్స్‌పై మోహన్ బాబు నిర్మిస్తున్నాడు.

కన్నప్ప సినిమా డిసెంబర్‌ నెలలో తెలుగు, తమిళ, మలయాళ, కన్నడ, హిందీ, ఇంగ్లీష్ భాషల్లో వరల్డ్ వైడ్‌గా విడుదల కాబోతుంది. అయితే మేకర్స్ ఇప్పటికే ప్రమోషన్స్ స్టార్ట్ చేశారు. ఇందులో భాగంగా ప్రతి సోమవారం అప్డేట్ విడుదల చేస్తూ మూవీపై అంచనాలను పెంచేస్తున్నారు. ఇప్పటికే కన్నప్ప నుంచి విడుదలైన పోస్టర్స్ మంచి రెస్పాన్స్‌ను దక్కించుకున్నాయి. తాజాగా, నేడు సోమవారం, అలాగే శ్రీకృష్ణ జన్మాష్టమి కావడంతో మంచు విష్ణు తన కొడుకు అవ్రామ్ ఫస్ట్ లుక్ రిలీజ్ చేసి సినీ ఇండస్ట్రీలోకి ఎంట్రీ ఇచ్చినట్లు అధికారికంగా ప్రకటించాడు.

తన ఇన్‌స్టాగ్రామ్ వేదికగా పోస్టర్‌ను విడుదల చేస్తూ ఎమోషనల్ పోస్ట్ పెట్టాడు. ‘‘జన్మాష్టమి శుభాకాంక్షలు.. కన్నప్ప సినిమాలో నా అవ్రామ్ తిన్నడు పాత్రలో నటిస్తున్నాడు. అతను పెద్దయ్యాక ఈ తిన్నడే భక్త కన్నప్పగా మారుతాడు. ఫస్ట్ లుక్ లాంచ్ చేయడం గర్వంగా ఉంది. ఈ ప్రపంచానికి తను నటుడిగా పరిచయం అవుతున్నందుకు మాటలు రావడం లేదు. అతన్ని నటుడిగా చూడటం పట్ల మాటల్లో చెప్పలేనంత ఉత్సాహం ఉంది’’ అని రాసుకొచ్చాడు. అయితే అవ్రామ్ లుక్స్ సోషల్ మీడియాలో వైరల్ అవుతున్నాయి. అందులో అమ్మవారి ముందు నిల్చున్న పవర్ ఫుల్ లుక్ అందరినీ ఆకట్టుకుంటుంది. ఇక అది చూసిన వారంతా తండ్రికి తగ్గ తనయుడు అనిపించుకుంటాడని అని కామెంట్లు చేస్తున్నారు.

(Video Link Credits to vishnumanchu Instagram Channel)