ప్రభాస్ ‘కల్కి 2898 ఏడి’ అభిమానులకు భారీ షాక్..

దిశ, సినిమా: ప్రస్తుతం ఎన్నికల వాతావరణం చాలా వేడిగా ఉన్న నేపథ్యంలో జనాల మూడ్ సినిమాల మీద లేదు. ఈ నెల రోజులుగా విడుదలైనకొత్త చిత్రాల వసూళ్లు చూస్తే ఆ విషయం అర్థమవుతుంది. అందుకే రిస్క్ తీసుకోవడం ఎందుకని చాలా సినిమాలు విడుదలకు సిద్ధంగా ఉన్న వెనకడుగు వేస్తున్నాయి. అందులో ప్రభాస్ నటిస్తున్న ‘కల్కి 2898 ఏడి’ మూవీ కూడా ఒకటి.

దర్శకుడు నాగ్ అశ్విన్ నేతృత్వంలో పోస్ట్ ప్రొడక్షన్ పనుల్లో బిజీగా ఉన్న ‘కల్కి’ టీం.. బ్యాలెన్స్ ఉన్న ప్యాచ్ వర్క్ ఏప్రిల్ రెండో వారంలో పూర్తి చేయాలని చూస్తోంది. అయితే విఎఫెక్స్ కు ఎక్కువ టైం పడుతున్నందున మే 9 రిలీజ్ గురించి ఇప్పుడే ఒక నిర్ణయానికి కాలేకపోతున్నట్లు టాక్. ఇక ఈ మూవీలో లోకనాయకుడు కమల్ హాసన్ కూడా ముఖ్య పాత్రలో నటిస్తున్న విషయం తెలిసిందే.

దీంతో ఆయన క్యారెక్టర్ మీద బోలెడు ఆశలు పెట్టుకున్న మూవీ లవర్స్‌కు తాజాగా షాక్ ఇచ్చాడు కమల్ హాసన్. ఇటీవల ఓ ఇంటర్వ్యూలో పాల్గొన్న ఆయన ‘ ఈ మూవీలో నేను కేవలం అతిథిగా నటించాను, దానికి సంబంధించిన షూటింగ్ పూర్తయ్యింది’ అని తెలిపారు. కానీ కొన్ని నెలల క్రితం వచ్చిన న్యూస్‌లో కమల్ ఈ మూవీ చివరిలో పావు గంట కంటే తక్కువ నిడివిలో కనిపిస్తారని వినిపించింది. కానీ అతిథి పాత్ర అంటే పావుగంట కంటే తక్కువే ఉంటుందని అర్థమవుతుంది.