‘విశ్వంభర’ షూటింగ్‌లో సెట్‌లోకి ఊహించని గెస్ట్.. జ్ఞాపకాలను గుర్తుచేసుకుని చిరంజీవి ఎమోషనల్ పోస్ట్

దిశ, సినిమా: మెగాస్టార్ చిరంజీవి, డైరెక్టర్ వశిష్ట కాంబోలో ‘విశ్వంభర’ చిత్రం రాబోతున్న సంగతి తెలిసిందే. ఇందులో మెగాస్టార్ సరసన త్రిష, అషికా రంగనాథ్ ఇద్దరు నటించనున్నారు. దీనికి సంబంధించి అధికారిక ప్రకటనలు కూడా విడుదలయ్యాయి. విశ్వంభర షూటింగ్ శరవేగంగా జరుగుతోంది. ఈ క్రమంలో.. తాజాగా, తమిళ స్టార్ హీరో అజిత్, చిరంజీవి సినిమా షూటింగ్ సెట్‌కి వెళ్లి ఆయనను సర్‌ప్రైజ్ చేశాడు. సెట్‌కి వెళ్లి కాసేపు సమయం గడిపి ఫొటోలు కూడా తీసుకున్నాడు.

అయితే ఈ విషయాన్ని తెలుపుతూ.. మెగాస్టార్ ఓ ఎమోషనల్ పోస్ట్ షేర్ చేశాడు. ‘‘నిన్న సాయంత్రం విశ్వంభర సెట్ లోకి అనుకోకుండా ఓ అతిథి వచ్చారు. పక్క సెట్ లోనే షూటింగ్ జరుపుకుంటున్న అజిత్ నా దగ్గరకు వచ్చి కాసేపు గడిపాడు. మేము చాలా విషయాలు మాట్లాడుకున్నాం. అజిత్ తెలుగులో మొదటి సినిమా ప్రేమ పుస్తకం సమయంలో చేసినప్పటి విషయాలు గుర్తు చేసుకున్నాం. ఆ మూవీ ఆడియో లాంచ్ నేనే చేశాను. అజిత్ భార్య షాలిని జగదేక వీరుడు అతిలోక సుందరి సినిమాలో చైల్డ్ ఆర్టిస్ట్ గా పనిచేసింది. ఆ జ్ఞాపకాలు అన్ని గుర్తు చేసుకున్నాము. అజిత్ ఇప్పుడు ఎంత పెద్ద స్టార్ అయినప్పటికీ అదే మంచితనంతో ఉన్నాడు’’ అని రాసుకొచ్చాడు. అలాగే అజిత్‌తో దిగిన ఫొటోలను షేర్ చేశాడు.