గ్రేటర్లో మొబైల్ రైతు బజార్లు
దిశ, న్యూస్బ్యూరో: కరోనా వైరస్‌ను నివారించేందుకు ప్రభుత్వం లాక్డౌన్ ప్రకటించినా.. కూరగాయలు, నిత్యావసరాల కొనుగోలు పేరిట ప్రజలు బయటకు వస్తూనే ఉన్నారు. ఈ క్రమంలోనే ఎవరు అవసరానికి వస్తున్నారో తెలియకపోవడంతో పోలీసులు లాఠీలకు పనిచెబుతున్నారు. దీంతో పోలీసులపై విమర్శలు వస్తుండటంతో బల్దియా అధికారులు ఓ పరిష్కారాన్ని కనుగొన్నారు. వ్యవసాయ, మార్కెటింగ్ శాఖ సమన్వయంతో జీహెచ్ఎంసీ పరిధిలో శనివారం మొబైల్ కూరగాయల మార్కెట్లను ప్రారంభించారు. 177 మొబైల్ వాహనాల్లో దాదాపు 331లోకేషన్లలో తిరిగి కూరగాయల అమ్మకాలు చేపట్టేలా అధికారులు […]
దిశ, న్యూస్బ్యూరో: కరోనా వైరస్‌ను నివారించేందుకు ప్రభుత్వం లాక్డౌన్ ప్రకటించినా.. కూరగాయలు, నిత్యావసరాల కొనుగోలు పేరిట ప్రజలు బయటకు వస్తూనే ఉన్నారు. ఈ క్రమంలోనే ఎవరు అవసరానికి వస్తున్నారో తెలియకపోవడంతో పోలీసులు లాఠీలకు పనిచెబుతున్నారు. దీంతో పోలీసులపై విమర్శలు వస్తుండటంతో బల్దియా అధికారులు ఓ పరిష్కారాన్ని కనుగొన్నారు.
వ్యవసాయ, మార్కెటింగ్ శాఖ సమన్వయంతో జీహెచ్ఎంసీ పరిధిలో శనివారం మొబైల్ కూరగాయల మార్కెట్లను ప్రారంభించారు. 177 మొబైల్ వాహనాల్లో దాదాపు 331లోకేషన్లలో తిరిగి కూరగాయల అమ్మకాలు చేపట్టేలా అధికారులు చర్యలు చేపట్టారు.
దీనిలో భాగంగానే ఏఏ రూట్లలో వాహనాలు ఎప్పుడు వెళ్లాలో అధికారులు ఇప్పటికే షెడ్యూల్ ప్రకటించారు. కరోనా తీవ్రతను దృష్టిలో ఉంచుకుని ప్రజలెవరూ బయటకు రావద్దని, అందుకే మొబైల్ రైతు బజార్లను అందుబాటులోకి తీసుకువచ్చామని అధికారులు స్పష్టం చేశారు. ఈ విధానంతో మార్కెట్ ధరలకే ప్రజలకు అందుబాటులోకి వచ్చి, ధరలు అదుపులో ఉండటమే గాకుండా మార్కెట్లలో జనాలు గుంపులుగా ఉండటం తగ్గుతుందన్నారు.
మొబైల్ రైతుబజార్లలో కొనుకోలు చేయండి
ప్రజలెవరూ కూరగాయల కోసం గుంపులుగా బయటకు రావాల్సిన అవసరం లేదు. మీ ఏరియాల్లోకే ఈ వాహనాలు వస్తాయి. కావాల్సిన కూరగాయలు కొని పెట్టుకోండి. నిర్దేశిత ధరలకే అమ్మకాలు జరుగుతాయి. నగరంలోని ప్రజల సౌకర్యార్థం ఈ ప్రయోజనాన్ని కల్పిస్తున్నాం. ప్రజలు రోడ్ల మీద తిరిగి ఇబ్బంది కలిగించొద్దని కోరుతున్నాం
– బొంతు రామ్మోహన్, నగర మేయర్