ఈ ఆహారం గర్భిణీలకు ఒక వరం.. ఇవి తిన్నారంటే పుట్టే పిల్లల్లో స్థూలకాయం మాయం..

దిశ, వెబ్ డెస్క్ : ప్రతి తల్లి తనకు పుట్టబోయే బిడ్డ ఆరోగ్యంగా, ఫిట్‌గా ఉండాలని కోరుకుంటుంది. కానీ ఈ మధ్యకాలంలో పిల్లలను ఎంత ఫిట్ గా ఉంచాలనుకున్నా, మంచి సంరక్షణ ఉన్నప్పటికీ చిన్నతనం నుండే పిల్లల్లో ఊబకాయం పెరగడం ప్రారంభమవుతుంది. దీన్నే చిన్ననాటి ఊబకాయం అని పిలుస్తారు. ఈ ఊబకాయం మధుమేహం, క్యాన్సర్, గుండె సంబంధిత వ్యాధులకు కారణమవుతుంది. గర్భధారణ సమయంలో మహిళలు తినే వస్తువులు పిల్లల బరువును కూడా ప్రభావితం చేస్తాయని నిపుణులు భావిస్తున్నారు.

అందుకే మహిళలు తమ ఆహారం పై ప్రత్యేక శ్రద్ధ వహించాలి. ప్రెగ్నెన్సీ సమయంలో మెడిటరేనియన్ డైట్ పాటించడం వల్ల పిల్లల్లో చిన్ననాటి ఊబకాయాన్ని నివారించవచ్చని తాజా అధ్యయనం సూచిస్తుంది. ఈ అధ్యయనం ఇంటర్నేషనల్ జర్నల్ ఆఫ్ ఒబేసిటీలో ప్రచురించింది. మెడిటరేనియన్ డైట్ పాటించే స్త్రీలకు పుట్టే పిల్లలకు ఊబకాయం వచ్చే అవకాశం కేవలం 6 శాతం మాత్రమే ఉందని తేలింది.

మధ్యధరా ఆహారం..

ఇది మొక్కల ఆధారిత ఆహారం. ఇందులో పండ్లు, కూరగాయలు, తృణధాన్యాలు, చిక్కుళ్ళు ఎక్కువగా తీసుకుంటారు. ఈ కాలంలో మీరు రెడ్ మీట్‌ను నెలలో 2 నుండి 3 సార్లు మాత్రమే తినవచ్చు. ఈ ఆహారంతో వ్యాయామం చేయడం ముఖ్యం.

నూనె, నెయ్యి లేదా వెన్నకు బదులుగా, ఆలివ్ లేదా కనోలా నూనెను ఉపయోగించాలి. ఆహారంలో రుచి పెరగాలంటే ఉప్పు తక్కువగా, మూలికలను ఎక్కువగా వాడతారు.

గర్భధారణ సమయంలో మధ్యధరా ఆహారం ప్రయోజనాలు...

మెడిటరేనియన్ ఆహారంలో ఫైబర్, యాంటీఆక్సిడెంట్లు, ఆరోగ్యకరమైన కొవ్వులు పుష్కలంగా ఉంటాయి. గర్భిణీ స్త్రీలు ఈ ఆహారాన్ని అనుసరిస్తే, పిల్లలు యుక్తవయస్సు వరకు ఊబకాయం నుంచి సురక్షితంగా ఉంటారు.

గర్భధారణ సమయంలో మధ్యధరా ఆహారం తీసుకోవడం వల్ల గర్భధారణ మధుమేహం వచ్చే ప్రమాదం కేవలం 35% తగ్గుతుంది. అలాగే కడుపులో పిల్లల బరువు కూడా తక్కువగా ఉంటుంది.

మధ్యధరా ఆహారం తీసుకోవడం ద్వారా, గర్భం ఆరోగ్యంగా ఉంటుంది. బిడ్డ కూడా ఆరోగ్యంగా ఉంటుంది. ఈ రకమైన ఆహారంలో ఆకుపచ్చ కూరగాయలను చేర్చడం చాలా ముఖ్యం. ఎందుకంటే ఇందులో ఫోలిక్ యాసిడ్ ఉంటుంది. ఇది పుట్టుకతో వచ్చే లోపాలను నివారించడానికి అవసరం.

2 సంవత్సరాల వయస్సు వరకు ఊబకాయం పెరగదు..

గర్భధారణ సమయంలో మెడిటరేనియన్ డైట్‌ని అనుసరించడం వల్ల రెండు సంవత్సరాల వయస్సులో పిల్లల అధిక బరువు లేదా ఊబకాయం వచ్చే అవకాశాలను గణనీయంగా తగ్గిస్తుందని అధ్యయనం తెలిపింది. అంతే కాదు శిశువు అనేక ఇతర వ్యాధుల నుంచి కూడా రక్షించబడుతుంది.

మధ్యధరా ఆహారం అంటే ఏమిటి ?

మధ్యధరా ఆహారం సమతుల్య ఆహారం. ఇందులో ఎక్కువగా పండ్లు, కూరగాయలు, బీన్స్, బ్రౌన్ రైస్, ఆలివ్ ఆయిల్, చిక్కుళ్ళు, గింజలు, ఆరోగ్యకరమైన కొవ్వులు ఉంటాయి. వీటిని తీసుకోవడం ద్వారా గర్భిణికి విటమిన్లు, పోషకాలు పుష్కలంగా అందుతాయి. ఈ ఆహారాన్ని అనుసరించేటప్పుడు, ప్రాసెస్ చేసిన మాంసం, స్వీట్లు, తీపి పానీయాలకు దూరంగా ఉండాలి.

గర్భిణీ ఆహారం శిశువు బరువును ఎలా ప్రభావితం చేస్తుంది ?

బాల్య ఊబకాయం ప్రపంచవ్యాప్తంగా నెలకొని ఉన్న తీవ్రమైన ఆరోగ్య సమస్య. భారతదేశంలో చిన్ననాటి ఊబకాయంతో బాధపడుతున్న పిల్లల సంఖ్య 2022 నాటికి 2.5 కోట్లుగా అంచనా వేశారు. బాల్య స్థూలకాయానికి చాలా కారణాలు ఉన్నప్పటికీ, గర్భిణీ ఆహారం కూడా ఇందులో ముఖ్యమైన పాత్ర పోషిస్తుందంటున్నారు నిపుణులు.

గర్భధారణ సమయంలో పోషకాహారం లోపించిన మహిళల పిల్లలు 2 నుంచి 4 సంవత్సరాల వయస్సులో ఊబకాయం చెందడం ప్రారంభిస్తారు. అందుకే తల్లి పోషణ నాణ్యతను మెరుగుపరచడం చాలా ముఖ్యం.

* గమనిక : పైవార్తలోని సమాచారం ఇంటర్నెట్ ఆధారంగా సేకరించబడింది. పాఠకుల అవగాహనకోసం మాత్రమే అందిస్తున్నాం. నిర్ధారణలు, పర్యవసనాలకు ‘దిశ’ బాధ్యత వహించదు. ఆరోగ్యానికి సంబంధించిన నిర్ణయాలు తీసుకునే ముందు తప్పకుండా నిపుణులను సంప్రదించగలరు.