'మర్డర్' సినిమా రిలీజ్‎కి లైన్ ‎క్లియర్

దిశ ప్రతినిధి, నల్లగొండ:
వివాదస్పద దర్శకుడు రామ్ గోపాల్ వర్మ తెరకెక్కిస్తున్న ‘మర్డర్’ సినిమా విడుదలకు లైన్ క్లియర్ అయింది. మిర్యాలగూడలో ప్రణయ్ హత్య కేసు దేశవ్యాప్తంగా సంచలనం సృష్టించిన సంగతి తెలిసిందే. ప్రముఖ వ్యాపారి మారుతీరావు తన కూతురు అమృతను ప్రేమించి పెళ్లి చేసుకున్న ప్రణయ్ అనే యువకుడిని దారుణంగా హత్య చేయించాడు. ఈ కేసులో కీలక నిందితుడిగా ఉన్న మారుతీరావు హైదరాబాదులో ఓ ప్రైవేటు లాడ్జిలో ఇటీవల ఆత్మహత్య చేసుకున్నాడు.

ఈ వ్యవహారంపై రామ్ గోపాల్ వర్మ మర్డర్ పేరుతో అమృత, ప్రణయ్‎ల ప్రేమ కావ్యాన్ని తెరపైకి ఎక్కించాడు. ఈ సినిమా విడుదలను అడ్డుకోవాలంటూ కోర్టు మెట్లెక్కారు. గతంలో దీనిపై నల్లగొండ జిల్లా కోర్టులో వాదనలు జరగగా, సినిమా విడుదలపై కోర్టు స్టే ఇచ్చింది. తాజాగా శుక్రవారం హైకోర్టు స్టేను కొట్టివేస్తూ తీర్పునిచ్చింది. ప్రణయ్, అమృత, మారుతీ రావు పేర్లు, ఫొటోలు వాడకుండా సినిమా రిలీజ్ కి చేసుకోవాలంటూ కోర్టు ఆదేశాలు ఇచ్చింది. మూవీలో వారి పేర్లు వాడబోమని చిత్ర యూనిట్ కోర్టుకు తెలియజేసింది.