రెండో పెళ్లిపై సుమంత్ క్లారిటీ: జీవితం.. విడాకుల తర్వాత 'మళ్లీ మొదలైంది' అంటూ

దిశ, వెబ్‌డెస్క్: అక్కినేని హీరో సుమంత్ రెండో పెళ్లి చేసుకుంటున్నాడంటూ రెండు రోజుల నుంచి సోషల్ మీడియాలో వార్తలు గుప్పుమంటున్న సంగతి తెలిసిందే. ఇక ఈ పెళ్లి వార్తపై వివాదాస్పద దర్శకుడు రామ్ గోపాల్ వర్మ సైతం తనదైన రీతిలో స్పందించి ఇంకా వైరల్ గా మార్చాడు. దీంతో ఈ వైరల్ న్యూస్ కాస్తా చివరికి సుమంత్ కు చేరడంతో ఆయన ఈ పుకార్లకు చెక్ పెట్టాడు. తన రెండో పెళ్లి వార్తలపై క్లారిటీ ఇస్తూ ఒక వీడియో ను రిలీజ్ చేశారు. తాను రెండో పెళ్లి చేసుకోవడం లేదని స్పష్టం చేశారు.

” నేను రెండో పెళ్లి చేసుకుంటున్నాను అంటూ వస్తున్న వార్తలను విన్నాను. అదంతా అబద్ధం. నేను రెండో పెళ్లి చేసుకోవడం లేదు. ఆ వెడ్డింగ్ కార్డు నేను కొత్తగా చేస్తున్నప్రాజెక్టుకు సంబంధించింది. పొరపాటున అది లీక్ కావడంతో ఇంత రచ్చ జరిగింది. దాన్ని మీరంతా తప్పుగా అర్థం చేసుకున్నారు.” అంటూ క్లారిటీ ఇచ్చాడు. అంతేకాకుండా తాజాగా ఆ సినిమాకు సంబంధించిన ఫస్ట్ లుక్ ని కూడా రివీల్ చేశాడు. ‘మళ్లీ మొదలైంది’ అనే టైటిల్ ని ఖరారు చేస్తూ రివీల్ చేసిన ఈ పోస్టర్ ఆద్యంతం ఆకట్టుకొంటుంది. జీవితం.. విడాకుల తర్వాత అంటూ క్యాప్షన్ ఇచ్చారు. దీంతో ఈ పుకార్లు నిజంకాదని తేలిపోయింది.