కేంద్ర మాజీ మంత్రి బూటా సింగ్ కన్నుమూత

దిశ, వెబ్‌డెస్క్: కాంగ్రెస్ నేత, కేంద్ర మాజీ మంత్రి బూటా సింగ్ కన్నుమూశారు. శనివారం ఉదయం ఆయన తుదిశ్వాస విడిచారు. రాజస్థాన్ నుంచి ఎంపీగా ప్రాతినిధ్యం వహించిన బూటా సింగ్.. కేంద్ర హోం మంత్రిగా, బిహార్ గవర్నర్‌గా సేవలందించారు. జాతీయ ఎస్సీ కమిషన్ చైర్మన్‌గా కూడా బూటా సింగ్ పనిచేశారు. బూటా సింగ్​ మృతి పట్ల పలువురు నేతలు తీవ్ర దిగ్భ్రాంతి వ్యక్తం చేశారు.

బూటా సింగ్ మరణంతో ఈ దేశం ఒక గొప్ప సేవకుడిని కోల్పోయింది. ఆయన తన జీవితం మొత్తాన్ని ప్రజాసేవకు అంకితం చేశారు. ఈ కష్టసమయంలో ఆయన కుటుంబానికి నా ప్రగాఢ సానుభూతి అంటూ కాంగ్రెస్ నాయకుడు రాహుల్ గాంధీ ట్వీట్టర్ వేదికగా విచారం వ్యక్తం చేశారు.

బూటా సింగ్ మృతి పట్ల ప్రధాని నరేంద్ర మోదీ సంతాపం ప్రకటించారు. ఆయన ఒక అనుభవశీలి.. పేద, అణగారిన వర్గాల పక్షాన తన గొంతుకను వినిపించారు. ఆయన కుటుంబానికి తన ప్రగాఢ సానుభూతి తెలిపారు.