ఆర్ఎస్ఐ ఆదిత్య సాయి ఫ్యామిలీకి ఆర్థిక సాయం

దిశ, తెలంగాణ క్రైమ్‌బ్యూరో: టీఎస్ఎస్పీ గ్రేహౌండ్స్ ఆర్ఎస్ఐ ఆదిత్య సాయికుమార్ కుటుంబానికి తోటి ఉద్యోగులు అండగా నిలిచారు. ఛత్తీస్‌గఢ్ సరిహద్దుల్లో కూంబింగ్ నిర్వహిస్తుండగా ఈనెల 16న ఆదిత్య సాయికుమార్ తుపాకీ మిస్ ఫైర్ కావడంతో మరణించారు. దీంతో తోటి ఉద్యోగులు అతని కుటుంబానికి ఆర్థిక సాయం చేసేందుకు ముందుకు వచ్చారు. ఉద్యోగులంతా కలిసి రూ.27.50లక్షలను చెక్కు రూపంలో ఆయన సతీమణి, కుటుంబ సభ్యులకు టీఎస్ఎస్పీ అడిషనల్ డీజీపీ అభిలాష భిష్ట చేతుల మీదుగా బుధవారం అందజేశారు. ఈ సందర్భంగా టీఎస్ఎస్పీ ఉద్యోగులను అడిషనల్ డీజీపీ అభినందించారు. ఆదిత్య సోదరునికి కారుణ్య నియామకం కింద డీజీపీ ప్రధాన కార్యాలయంలో జూనియర్ అసిస్టెంట్‌గా నియామకం ఉత్తర్వులను డీజీపీ మహేందర్‌రెడ్డి జారీ చేశారు.