ఫలించిన ఈటల వ్యూహం.. బీజేపీ గూటికి టీఆర్ఎస్ నేతలు!

దిశ, తెలంగాణ బ్యూరో : అధికార పార్టీ అసంతృప్తి నేతలపై బీజేపీ కన్నేసింది. మాజీ మంత్రి ఈటల రాజేందర్​ నేతృత్వంలో ఉద్యమకారులను ఒక్కతాటిపైకి తీసుకువచ్చే ప్రయత్నాలు మొదలయ్యాయి. దీనిలో భాగంగా బీజేపీ ఆపరేషన్​ ఆకర్ష్​ మొదలైంది. తెలంగాణ ఉద్యమంలో ముందు నిలిచిన వారిలో ఇప్పుడు ఎలాంటి ప్రాధాన్యత లేకుండా తిరుగుతున్న నేతలను కాషాయ దళంలోకి తీసుకునేందుకు భారీ ప్రయత్నాలు జరుగుతున్నాయి. ఈ నేపథ్యంలోనే తెలంగాణ ఉద్యోగుల జేఏసీ నేతలు టీఆర్​ఎస్​ను వీడేందుకు సిద్ధమవుతున్నారు.

ఇప్పటికే స్వామిగౌడ్​ బీజేపీలో చేరగా.. తాజాగా మరో ఉద్యోగ నేత కూడా కాషాయం కండువా కప్పుకోనున్నారు. టీఎస్​పీఎస్సీ మాజీ సభ్యుడు సీ.విఠల్​ ఈ వారం రోజుల వ్యవధిలోనే పార్టీలో చేరేందుకు సన్నాహాలు చేస్తున్నారు. ప్రస్తుతం విఠల్​ బీజేపీలో చేరుతుండగా.. వచ్చే కొద్ది రోజుల్లో మరికొంతమంది ఉద్యోగ జేఏసీ నేతలు కూడా బీజేపీ తీర్థం పుచ్చుకోనున్నారు. అలాంటి వారితో ఈటల రాజేందర్​ బృందం చర్చలు సాగిస్తోంది.

ఏండ్లుగా అసంతృప్తి

తెలంగాణ ఉద్యోగుల జేఏసీని ముందుండి నడిపించిన నేతలకు ప్రస్తుతం అధికార పార్టీలో ప్రాధాన్యత కరువైంది. ఒకరిద్దరు మినహా.. చాలా మంది నేతలు ప్రభుత్వం నుంచి ఏదో ఒకటి ఆశించినా.. వారికి ప్రగతిభవన్​ గేటు దాటి ఎంట్రీ రావడం లేదు. ఏండ్ల నుంచి అధిష్టానానికి మొర పెట్టుకుంటున్నా కనీసం అపాయింట్​మెంట్​ కూడా దక్కడం లేదు. ఈ నేపథ్యంలో ప్రత్యామ్నాయ రాజకీయ పరిస్థితుల కోసం ఎదురుచూస్తున్నారు. గతంలో టీఎన్జీఓ అధ్యక్షుడిగా, జేఏసీ చైర్మన్​గా వ్యవహరించిన స్వామిగౌడ్​ బీజేపీలో చేరిన విషయం తెలిసిందే. తాజాగా అదే దారిలో విఠల్​ కూడా చేరిపోయారు. వాస్తవానికి తెలంగాణ ఉద్యమానికి పునాదులుగా నిలిచిన జేఏసీ నేతలు ఇప్పుడు ఎలాంటి ప్రాధాన్యత లేకుండా ఖాళీగా ఉన్నారు. బేవరేజెస్​ కార్పొరేషన్​ మాజీ చైర్మన్​ దేవీ ప్రసాద్​, టీఎస్​పీఎస్సీ మాజీ సభ్యుడు విఠల్​ తో పాటుగా పలువురు ఉద్యమ నేతలు ప్రస్తుతం అసంతృప్తితో ఉన్నట్లు తెలుస్తోంది. ఈ అసంతృప్తిని అనుకూలంగా మల్చుకునేందుకు బీజేపీ చక్రం తిప్పుతోంది.

ఎవరెవరు ఉన్నారు..?

ప్రస్తుతం విఠల్​ చేరిక ఖరారైంది. ఈ వారం రోజుల వ్యవధిలో ఢిల్లీలో ఆయన బీజేపీ గూటికి చేరనున్నారు. ఇదే వరుసలో మరో ఇద్దరు జేఏసీ నేతలు కూడా ఉన్నట్లు సమాచారం. ఉద్యోగ జేఏసీ నేత, ఓ కార్పొరేషన్​ మాజీ చైర్మన్​తో పాటుగా మెడికల్​ జేఏసీకి చెందిన కీలక నేత కూడా బీజేపీకి టచ్​లో ఉన్నట్లు తెలుస్తోంది. వీరితో పాటుగా కరీంనగర్​ జిల్లాకు చెందిన ఓ మాజీ ఎమ్మెల్సీ, ఉద్యోగ సంఘం మాజీ నేత కూడా ఈటల రాజేందర్​తో చర్చించినట్లు ప్రచారం జరుగుతోంది. ఇలాంటి నేతలను అధికార పార్టీకి దూరం చేస్తే ఉద్యమకారులకు ప్రాధాన్యత లేదనే అంశాన్ని క్షేత్రస్థాయికి తీసుకెళ్లే అవకాశం ఉంటుందని, దీంతో బీజేపీకి కలిసిరావడమే కాకుండా.. టీఆర్​ఎస్​ను దెబ్బకొట్టినట్లు ఉంటుందని భావిస్తున్నారు.

వారం రోజుల్లో చేరుతా : విఠల్​

బీజేపీలో చేరుతున్నారనే ప్రచారం నేపథ్యంలో విఠల్​ ఈ సందర్భంగా ‘దిశ’తో మాట్లాడారు. తాను బీజేపీలో చేరుతున్నానని, వారం రోజుల్లో ఢిల్లీలో సీనియర్​ నేతల సమక్షంలో చేరుతున్నట్లు వెల్లడించారు. తెలంగాణ ఉద్యమం కోసం త్యాగాలు చేసిన ఉద్యమకారులను గుర్తించడం లేదని ఆవేదన వ్యక్తం చేశారు.

ఎంపీ సీటుకు రాజీనామా.. సిద్ధమైన బండా ప్రకాష్