జనగాయకుడికి నివాళి

బండెనక బండి కట్టి

పదహారు బళ్లు కట్టి

కోట్లమంది ప్రజల హృదయాల్లో

గూడు కట్టుకుని

గుండెల్లో బుల్లెట్ ను దాచుకున్న

గాయక బుల్లెట్ ఓ గద్దర్

ఇది

గుండె పొరల్లోంచి

అగ్నికణాల్లా నిప్పులు కక్కుతూ

ఉబికి వస్తున్న

నీరాజనాక్షరాగ్ని

మంచు సిరా బిందువులు

తన కనురెప్పల సవ్వడికి

కాలి గజ్జెల మువ్వలు కదిలి

కావ్య ఖండికలు తెలంగాణపై

విప్లవోద్యమ గీతికలను

పొడుస్తున్న పొద్దు మీద

నడుస్తున్న కాలమా

పోరు తెలంగాణమా

అలవోకగా అవలీలగా ఆలపించి

తెలంగాణ సాధనలో

ఓ విజయధ్వజమై నిలిచిన

సాహస గాయక శిఖరమా

నీవు నిష్క్రమించినా

నీ పాటలు మా మస్తిష్కాల్లో

ఎర్రమందారలై పూస్తూనే ఉంటాయి.

అనునిత్యం

మా హృదయాల్లో నీవు

మౌన ముద్రవై నిలిచి వుంటావులే.

కొరుప్రోలు హరనాథ్

97035 42598