అదుపుతప్పి చెట్టును ఢీకొన్న కారు.. ప్రిన్సిపాల్ మృతి

దిశ, మునిపల్లి: కళాశాల క్యాంపస్ నుంచి క్వార్టర్స్ కు కారులో వెళుతూ అదుపుతప్పి చెట్టును ఢీకొన్న సంఘటనలో తెలంగాణ రాష్ట్ర సోషల్ వెల్ఫేర్ రెసిడెన్షియల్ డిగ్రీ కళాశాల ప్రిన్సిపాల్ మృతి చెందిన సంఘటన చోటు చేసుకుంది. మునిపల్లి పోలీసులు తెలిపిన కథనం ప్రకారం.. మునిపల్లి మండల పరిధిలోని బుదేరా సోషల్ వెల్ఫేర్ రెసిడెన్షియల్ డిగ్రీ కళాశాల ప్రిన్సిపాల్ గా పనిచేస్తున్న సిలంగారి అర్చన(36) ఈ నెల 6వ తేదీన సాయంత్రం 5.30 గంటల సమయంలో కళాశాల నుంచి కాలేజీ క్యాంపస్ లో ఉన్న క్వార్టర్స్ కు తనతో పనిచేస్తున్న తోటి ఉద్యోగి కరెల వీణతో కలిసి కారులో వెళ్తుండగా కాలేజీ పరిసరాల్లోనే కారు అదుపు తప్పి చెట్టును ఢీకొంది. ఇది గమనించిన తోటి ఉద్యోగులు వారిని హుటాహుటినా సదాశివపేట లోని ఎస్.ఎన్ ప్రైవేటు ఆసుపత్రికి తరలించారు. అర్చన పరిస్థితి విషమంగా ఉండడంతో మెరుగైన చికిత్స కోసం రంగారెడ్డి జిల్లా శేరి లింగంపల్లి లోని నల్గొండ ఆసుపత్రికి తరలించారు. అర్చన చికిత్స పొందుతూ 7వ తేదీ గురువారం మరణించినట్లు కుటుంబ సభ్యులు తెలిపారు. ప్రమాదంపై అర్చన భర్త సిలంగారి ప్రవీణ్ ఫిర్యాదు మేరకు మునిపల్లి పోలీసులు కేసు నమోదు చేసుకుని దర్యాప్తు చేస్తున్నారు.