పిచ్చికుక్క దాడిలో ఏడుగురికి గాయాలు...

దిశ, దుబ్బాక : పిచ్చికుక్క దాడి చేసిన ఘటనలో ఏడుగురు గాయాల పాలయ్యారు. పిచ్చికుక్క ఒకరి తర్వాత ఒకరి పై దాడి చేసి భయభ్రాంతులకు గురిచేసిన సంఘటన దుబ్బాక మండలం హబ్షీపూర్ గ్రామంలో చోటుచేసుకుంది. స్థానికులు తెలిపిన వివరాల ప్రకారం బైండ్ల లక్ష్మీ, గున్నల లచ్చవ్వ, అబ్దుల్ షబానా బేగం, పోచయ్య, పాషా, మరో ముగ్గురు పిచ్చికుక్క దాడిలో గాయాల పాలయ్యారు.

కుక్క కాటుకు గురైన వారిని ప్రథమ చికిత్స కొరకు దుబ్బాక వంద పడకల ఆసుపత్రికి తిసుకెళ్లగా చికిత్స అనంతరం మెరుగైన వైద్యం కొరకు సిద్దిపేట ప్రభుత్వ ఆసుపత్రికి 108 అంబులెన్స్ లో తరలించారు. కుక్క కాటుకు గురైన వారు ప్రస్తుతం ఆరోగ్యంగా ఉన్నారని స్థానికులు తెలిపారు. కుక్కల బెడద విపరీతంగా పెరిగిపోవడంతో ప్రజలు గడపదాటి బయటకు వెళ్లలేని పరిస్థితి నెలకొంది. ఉన్నతాధికారులు స్పందించి కుక్కల బెడద నివారణకు చర్యలు చేపట్టాలని కోరుతున్నారు.