విషాదం...కూతురు పుట్టింది అని చూసి వస్తుండగా తండ్రి మృతి...

దిశ, తూప్రాన్ : కూతురు పుట్టింది అని సంతోషం తో తోటి మిత్రునితో కలిసి చూసి తిరిగి ఇంటికి వెళ్తుండగా అనుకోని మృత్యువు తండ్రిని కాటేసింది. ఈ విషాదకరమైన ఘటన మనోహరాబాద్ మండలం దండుపల్లి వద్ద చోటు చేసుకుంది. స్థానికుల వివరాల ప్రకారం… మనోహరాబాద్ మండలం కుచారం గ్రామానికి చెందిన విజయ్ యాదవ్ కి సోమవారం తూప్రాన్ ఆసుపత్రిలో కూతురు జన్మించింది. దీంతో మంగళవారం తన మిత్రుడు ప్రేమ్ చంద్ తో కలిసి స్కూటీపై వెళ్లి కూతురును చూసి తిరిగి ఇంటికి వస్తుండగా దండుపల్లి వద్ద భారీ లోడ్ మలుపు తీసుకుంటున్న డీసీఎం లారీ గమనించక ఢీ కొనడంతో విజయ్ యాదవ్ అక్కడిక్కడే ప్రాణాలు కోల్పోగా ప్రేమ్ చంద్ కి గాయాలు అయ్యాయి. ఘటన స్థలానికి చేరుకున్న ఎస్ఐ సుభాష్ గౌడ్ మృతదేహాన్ని పోస్టుమార్టం నిమిత్తం తూప్రాన్ ప్రభుత్వ ఆసుపత్రికి తరలించి విచారణ చేపట్టారు.