పెళ్లి పత్రికలు ఇవ్వడానికి వెళ్లి...రోడ్డు ప్రమాదంలో వ్యక్తి మృతి

దిశ, మిరుదొడ్డి: పెళ్లి పత్రికలు ఇవ్వడానికి వెళ్లి తిరుగు ప్రయాణంలో ప్రమాదవశాత్తు రోడ్డు ప్రమాదంలో వ్యక్తి మృతి చెందిన సంఘటన మిరుదొడ్డి మండల కేంద్రంలో చోటు చేసుకుంది. స్థానికులు, పోలీసులు తెలిపిన వివరాల ప్రకారం.. గ్రామానికి చెందిన గున్నాల కనకరాజు (40) బుధవారం సాయంత్రం చెప్యాల గ్రామంలో తన చెల్లెకి పెళ్లి పత్రిక ఇచ్చి తిరిగి తన మోటార్ సైకిల్ పై మిరుదొడ్డికి వస్తున్నాడు. మార్గమధ్యలో మిరుదొడ్డి గ్రామ శివారులో బామ్మరాయి చెరువు వద్దకు రాగానే మోటార్ సైకిల్ అదుపు తప్పి చెరువు కట్ట క్రిందికి పడిపోవడంతో తీవ్ర గాయాలు అయ్యాయి. స్థానికులు గమనించి అంబులెన్స్ లో దుబ్బాక ప్రభుత్వ ఆసుపత్రికి తరలించారు. అక్కడ చికిత్స పొందుతూ మరణించినట్లు తెలిపారు. దీంతో గ్రామంలో విషాద ఛాయలు నెలకొన్నాయి. మృతుని అన్న గున్నాల ముత్యం ఫిర్యాదు మేరకు కేసు నమోదు చేసినట్లు మిరుదొడ్డి ఎస్సై పరశురామ్ తెలిపారు.