కరోనా అనుమానితుడు ఐసోలేషన్‎కు తరలింపు

దిశ, మెదక్: కొమురవెల్లి పోలీస్ స్టేషన్ పరిధి చేర్యాల మండలం వేచరేణిలో.. కరోనా అనుమానిత వ్యక్తిని ఐసోలేషన్‌కు తరలించారు. కాగా, అతడు ఇటీవల ఢిల్లీలోని నిజామొద్దీన్ మర్కజ్ ప్రార్థన మందిర సమావేశానికి హాజరైనట్లు తెలుస్తోంది. ఈ నెల 13 నుంచి 15 తేది వరకు ఢిల్లీలో జరిగిన సదస్సుకు వేచరేణికి చెందిన జమీన్ పాషా హాజరయ్యాడు. ఆ తర్వాత 18వ తేదిన రైలులో హైదరాబాద్‌కు తిరిగివచ్చి.. గోల్కొండ బేతిగల్ ప్రాంతంలో ఐదు రోజులు ఉన్నాడు. ఈ నెల 25న తన సొంత కారులో వేచరేణికి చేరుకున్నాడు. సమాచారం అందుకున్న అధికారులు మంగళవారం నాడు జమీన్ పాషాను మిట్టపల్లిలోని సురభి మెడికల్ కాలేజీలో ఏర్పాటు చేసిన ఐసోలేషన్‌కు తరలించారు. అలాగే జమీన్ పాషా కుటుంబ సభ్యులు, స్నేహితులను 14 రోజుల పాటు హోమ్ క్వారంటైన్ పాటించాలని అధికారులు సూచించారు.

Tags: Corona suspect, move, isolation, komuravelli, medak