సినీ ఫక్కీలో సీఎం కేసీఆర్ బంధువుల కిడ్నాప్..!

దిశ, వెబ్‌డెస్క్ : హైదరాబాద్ మహానగరంలోని బోయిన్‌పల్లిలో మంగళవారం అర్థరాత్రి కిడ్నాప్ కలకలం రేపింది. సినీ ఫక్కిలో వచ్చిన కొందరు దుండగులు సీఎం కేసీఆర్ సోదరి తరఫు సమీప బంధువులు. ముఖ్యమంత్రి పీఏ వేణుగోపాల్ రావు బావమరిది అయిన హాకీ క్రీడాకారుడు ప్రవీన్ రావును ఎత్తుకెళ్లారు. ఆ సమయంలో ఏపీ పొలిటికల్ లీడర్, మాజీ మంత్రి భూమా అఖిల ప్రియ భర్త భార్గవ్ రామ్ పేరుతో బెదిరింపులకు పాల్పడినట్లు తెలుస్తోంది. ప్రవీణ్ రావుతో పాటు అతని ఇద్దరు సోదరులు సునీల్ రావు, నవీన్ రావులు కూడా కిడ్నాప్‌నకు గురయ్యారు. సమాచారం అందుకున్న నార్త్‌జోన్ టాస్క్ ఫోర్సు పోలీసులు కిడ్నాపర్లను వెంబడించారు.

రాంగోపాల్ పేట్‌లో రెండు వాహనాలను పోలీసులు చుట్టుముట్టి ముగ్గురు నిందితులను అరెస్టు చేశారు. వారితో పాటు మరో 8మందిని కూడా అదుపులోకి తీసుకున్నట్లు వెల్లడించారు. అఖిలప్రియ భర్త భార్గవ్ రామ్ సోదరుడు చంద్రహాస్ ప్రస్తుతం పోలీసుల అదుపులో ఉన్నారు. హఫీజ్ పేటలోని రూ.100కోట్ల విలువైన భూమి కోసం గత కొంతకాలంగా వీరి మధ్య గొడవ జరుగుతున్నట్లు సమాచారం.

మా వాళ్లు సేఫ్..

మంగళవారం అర్ధరాత్రి 11గంటల ప్రాంతంలో కిడ్నాప్‌నకు గురైన ప్రవీణ్ రావుతో పాటు అతని సోదరులు క్షేమంగా ఉన్నట్లు కుటుంబం ప్రకటించింది. పోలీసులు సకాలంలో స్పందించడంతో అంతా క్షేమంగా బయట పడినట్లు వారు చెప్పుకొచ్చారు.