ఫిట్‌మెంట్ ఫిక్స్.. ఉద్యోగ సంఘాలకు సీఎం క్లారిటీ

దిశ, తెలంగాణ బ్యూరో: వేతన సవరణపై సీఎం కేసీఆర్‎తో ఉద్యోగ సంఘాల ప్రతినిధుల సమావేశం ముగిసింది. సాయంత్రం నుంచి రాత్రి వరకు సుదీర్ఘంగా చర్చించారు. మండలి ఎన్నికల్లో ఉద్యోగ వర్గాల సహకారంతోనే విజయం వరించినట్లుగా యూనియన్ లీడర్లు సీఎంకు వివరించారు. ఈ సందర్భంగా ఉద్యోగ నేతలకు సీఎం కేసీఆర్​ కృతజ్ఞతలు తెలిపారు. అయితే, సమావేశంలో చర్చించిన అంశాలను ఇప్పుడే బయటకు వెల్లండించవద్దంటూ సీఎం కేసీఆర్ ఉద్యోగ సంఘ ప్రతినిధులకు సూచించినట్టు సమాచారం.

కాగా, ఫిట్‌మెంట్‌పై ఉద్యోగ నేతలకు సీఎం కేసీఆర్​స్పష్టమైన హామీ ఇచ్చినట్లు తెలుస్తోంది. ఇప్పటివరకు ఫిట్‌మెంట్‌పై ఉద్యోగులు చేస్తున్న డిమాండ్​ కంటే కొంత మెరుగ్గానే ఇస్తామని చెప్పినట్లు తెలుస్తోంది. 29 శాతం కంటే ఎక్కువగా ఫిట్‌మెంట్ రానున్నట్లు సమాచారం. ఉద్యోగ సంఘాల నేతలు మాత్రం 33 నుంచి 34 శాతం ఫిట్‌మెంట్ ఇవ్వాలని సీఎంను కోరారు. కేసీఆర్ దీనిపై సానుకూలంగానే స్పందించినట్లు చెప్పుతున్నారు. ఈ లెక్కన 29 నుంచి 33 వరకు ఫిట్‌మెంట్ వస్తుందని ఉద్యోగ సంఘాల నేతలు భావిస్తున్నారు.

ఈ విషయాన్ని అసెంబ్లీ వేదికగా ప్రకటిస్తామని, ఎలాంటి ప్రకటన చేయవద్దంటూ ఉద్యోగ నేతలకు సీఎం చెప్పడంతో సమాధానం దాట వేస్తున్నారు. అదే విధంగా పదవీ విరమణ పెంపును కూడా ప్రకటించే అవకాశం ఉందని ఉద్యోగ సంఘాల నేతలు చెప్పుతున్నారు. కాంట్రాక్ట్, ఔట్​ సోర్సింగ్​ఉద్యోగులకు కనీస వేతనం, సీపీఎస్ ఉద్యోగులకు కుటుంబ పెన్షన్​ సదుపాయం వంటి అంశాలన్నీ సీఎం రేపు అసెంబ్లీలో ప్రకటించనున్నట్లు ఉద్యోగ సంఘాల నేతలు వెల్లడించారు.