Hero Yash: వివాదంలో కన్నడ స్టార్ హీరో యష్.. మంత్రి ఈశ్వర్ ఖండ్రే సంచలన ఆదేశాలు

దిశ, వెబ్‌‌డెస్క్: కన్నడ సూపర్ స్టార్ యష్ (Yash) వివాదంలో చిక్కుకున్నారు. తన కొత్త మూవీ ‘టాక్సిక్’ (Toxic) షూటింగ్ కోసం ఇష్టానుసారంగా చెట్లను నరికివేశారంటూ ఆయన ఆరోపణలు ఎదుర్కొంటున్నారు. అయితే, తాజాగా ఆ ప్రాంతంలో చెట్ల నరికివేతపై ప్రభుత్వం విడుదల చేసిన శాటిలైట్ చిత్రాలతో పంచాయితీ మొదలైంది. ఈ మేరకు హిందుస్థాన్ మెషిన్ టూల్స్ (HMT) ప్లాంటేషన్‌లోని లోకేషన్‌ను అటవీ శాఖ మంత్రి ఈశ్వర్ ఖండ్రే (Forest Minister Ishwar Khandre) పరిశీలించారు. ఈ క్రమంలోనే ఆయన కీలక వ్యాఖ్యలు చేశారు.

చెట్లను నరికివేసిన ప్రాంతాన్ని తాను స్వయంగా పరిశీలించానని తెలిపారు. ఆ ప్రాంతంలో పెద్ద సంఖ్యలో చెట్లు ఉన్నట్లుగా గతేడాది శాటిలైట్ చిత్రాల్లో స్పష్టంగా కనిపించిందని పేర్కొన్నారు. నిబంధనల ప్రకారం.. అనుమతి తీసుకోకుండా అటవీ భూమిలో వేలాది చెట్లను నరికివేయడం శిక్షార్హమైన నేరమని ఆయన ఆగ్రహం వ్యక్తం చేశారు. ఈ ఘటనపై సమగ్ర దర్యాప్తు చేసి నివేదిక ఇవ్వాలని బెంగళూరు కార్పొరేషన్‌ (Bangalore Corporation)ను ఆదేశించానని తెలిపారు. చిత్ర యూనిట్‌పై చట్టపరమైన చర్యలు తీసుకుంటామని మంత్రి ఈశ్వర్ ఖండ్రే (Ishwar Khandre) స్పష్టం చేశారు.