ఫ్యాన్స్‌కు పూనకాలు తెప్పిస్తున్న చిరు ‘154’..

దిశ, సినిమా: మెగాస్టార్ చిరంజీవి స్టార్ డైరెక్టర్ బాబీ దర్శకత్వంలో మైత్రీ మూవీ మేకర్స్ నిర్మాణంలో ఓ భారీ ప్రాజెక్ట్‌ను తెరకెక్కిస్తున్నారు. ఈ మేరకు మెగాస్టార్ 154వ సినిమా పోస్టర్‌ను ట్వీటర్‌లో పోస్ట్ చేసిన దర్శకుడు బాబీ.. మెగాస్టార్‌తో తన సినిమా లాంచ్ అవడం గొప్ప అదృష్టంగా భావిస్తున్నానన్నాడు. ఈ సందర్భంగా మాట్లాడిన డైరెక్టర్.. ‘మెగాస్టార్ పేరు వింటే.. అంతు లేని ఉత్సాహం ! ఆయన పోస్టర్ చూస్తే.. అర్ధం కాని ఆరాటం ! తెర మీద ఆయన కనబడితే.. ఒళ్ళు తెలీని పూనకం! పద్దెనిమిదేళ్ల క్రితం ఆయన్ని మొదటి సారి కలసినప్పుడు నేను కన్న కల ఇప్పుడు నిజమవుతుంది. దీనికి అందరి ఆశీస్సులు కోరుకుంటున్నాను’ అని చిరుపై తన అభిమానాన్ని చాటుకున్నాడు.

ఇక ఈ పోస్టరు చూస్తే చిరును పక్కా మాస్‌గా చూపించబోతున్నట్లు అర్థమవుతుండగా.. అరాచకం ఆరంభం అనే హెడ్డింగ్‌తో చిరు చేతికి బ్రాస్ లైట్, మెడలో చైన్స్ వేసుకొని ఉండగా.. లైట‌ర్ వెలిగించి బీడి కాలుస్తున్నట్టు మాస్ లుక్‌లో చిరు కనిపిస్తున్నాడు. అలాగే ఈ పోస్టర్‌లో ‘పూనకాలు లోడింగ్’ అనే ట్యాగ్ లైన్ కూడా తగిలించారు. కాగా మెగాస్టార్ మాస్‌లుక్ చూసిన ఫ్యాన్స్.. ‘ఇదికదా మాస్ అంటే, అన్నయ్య లుక్ దుమ్ములేచిపోయింది, ఇక బాక్స్ ఆఫీస్ బద్దలే, చిరంజీవి అన్నయ్యను మరోసారి ఊర మాస్‌లా చూపించాలి బాబీ అన్నా’.. అంటూ కామెంట్స్ చేస్తున్నారు.