అన్నం పెట్టే రైతులంతా సంతోషంగా ఉండాలి: చంద్రబాబు

దిశ, వెబ్‌డెస్క్: ఎద్దు ఏడ్చిన చోట వ్యవసాయం నిలవదు, రైతు ఏడ్చిన చోట రాజ్యం నిలవదంటారని, పాలకులు ఇది గ్రహించకపోతే పుట్టగతులు ఉండవని ఏపీ ప్రతిపక్ష నేత చంద్రబాబు వ్యాఖ్యానించారు. బుధవారం జాతీయ రైతు దినోత్సవం సందర్భంగా రైతులకు శభాకాంక్షలు తెలుపుతూ చంద్రబాబు ట్వీట్ చేశారు. పదిమందికి అన్నంపెట్టే రైతులంతా ఎల్లప్పుడూ సంతోషంగా ఉండాలనేది టీడీపీ ఆకాంక్ష అన్నారు. ఏపీలో రైతుల ఆత్మహత్యలు రోజురోజుకు పెరుగుతుండటం, ఆత్మహత్యల్లో రాష్ట్రం మూడో స్థానంలోఉండటం విషాదకరమన్నారు. మరోవైపు ప్రజా రాజధాని అమరావతి ప్రాంత రైతులు 372రోజులుగా నిద్రాహారాలు లేకుండా ఉద్యమిస్తున్నారన్నారు. ఇంకోవైపు ప్రభుత్వం తన అప్పు పరిధిని పెంచుకోవడం కోసం వ్యవసాయ మోటార్లకు మీటర్లు బిగించి రైతుపై మరింత భారం వేయబోతుందన్నారు.