Toyota: ఫ్యూచర్ 'ఓవెన్ సిటీ'ని ప్రారంభించనున్న టయోటా.. మొదట 100 మంది తరలింపు

దిశ, బిజినెస్ బ్యూరో: ప్రముఖ కార్ల తయారీ సంస్థ టయోటా జపాన్‌లో ఫ్యూచర్ సిటీని నిర్మిస్తున్న సంగతి తెలిసిందే. 'ఓవెన్ సిటీ' పేరుతో 2021లోనే ప్రారంభమైన ఈ నగరంలో నివశించేందుకు 100 మంది నివాసితులను ఈ ఏడాదిలో తరలించనున్నట్టు ప్రకటించింది. మౌంట్ ఫుజీ నుంచి కేవలం కొన్ని కిలోమీటర్ల దూరంలో నిర్మించిన ఈ నగరం పూర్తి భవిష్యత్తు టెక్నాలజీతో పనిచేయనుంది. ఆటోమెటెడ్ డ్రైవింగ్, రోబోటిక్స్, ఏఐ టెక్నాలజీతో నడుస్తుంది. జపాన్‌కు చెందిన మేగజైన్ ది సన్ ప్రకారం, ఓవెన్ సిటీ ఒక ల్యాబ్ తరహాలో పనిచేయనుంది. ఈ నగరంలో టయోటా కంపెనీ తన పునరుత్పాదక, సెల్ఫ్ డ్రైవింగ్ కార్లు 'ఈ-ప్యాలెట్స్ ' ను పరీక్షించనుంది. అంతేకాకుండా నగరంలో అన్ని పనులూ రోబోటిక్స్ సాయంతో జరగనున్నాయి. వీటన్నిటినీ పరిశీలించేందుకు మానవుల తీరును అర్థం చేసుకునేందుకు కొందరికి నివాసం కల్పించనున్నారు. అందులో భాగంగా ప్రస్తుతం 100 మందిని, ఆ తర్వాత దశలో 2,000 మందిని తరలించనున్నట్టు కంపెనీ ఛైర్మన్ అకియో టయోడా విలేకరుల సమావేశంలో చెప్పారు. వోవెన్ సిటీలో కొత్త టెక్నాలజీని పరీక్షించే, అభివృద్ధి చేసే ప్రక్రియను వేగవంతం చేయాలని భావిస్తున్నట్టు తెలిపారు. అయితే, ఈ నగరానికి అయ్యే ఖర్చు గురించి కంపెనీ స్పష్టత ఇవ్వలేదు. గతంలో వచ్చిన నివేదికల ప్రకారం, దీనికి సుమారు రూ. 85 వేల కోట్ల వరకు ఖర్చు చేయనున్నట్టు సమాచారం.