కాంగ్రెస్.. టీఆర్ఎస్‌ కొమ్ము కాస్తోంది: బండి సంజయ్

దిశ, న్యూస్‌బ్యూరో: కరోనా కట్టడికి కేంద్రం.. తెలంగాణకు సాయం చేస్తున్నా టీఆర్ఎస్ నేతలు అసత్య ప్రచారం చేస్తున్నారని బీజేపీ రాష్ట్ర అధ్యక్షుడు బండి సంజయ్ వ్యాఖ్యానించారు. టీఆర్ఎస్‌కు కాంగ్రెస్ పార్టీ కొమ్ముకాసేలా వ్యవహరిస్తుందని మండిపడ్డారు. గురువారం హైదరాబాద్ బీజేపీ ఆఫీస్‌లో బండి సంజయ్ మాట్లాడుతూ కరోనా మరణాలు పెరుగుతున్నా సర్కార్ గాలికి వదిలేసిందని, అందుకే గవర్నర్ జోక్యం చేసుకోవాల్సి వచ్చిందన్నారు. ప్రభుత్వంపై నమ్మకం లేకనే ప్రజలు రాజ్‌భవన్ బాట పట్టారన్నారు. ఇతర రాష్ట్రాల్లో చేసినన్ని కరోనా టెస్టులు తెలంగాణలో ఎందుకు చేయడం లేదని ఆయన ప్రశ్నించారు. సెక్షన్ 8పై గవర్నర్ జోక్యం చేసుకున్నారని, దీనిపై గవర్నర్ అభిప్రాయం తర్వాత తమ పార్టీ స్పందిస్తుందన్నారు. ప్రభుత్వ తీరుపై కేంద్రానికి గవర్నర్ ఏం ఫిర్యాదు చేస్తారో చూసి పార్టీ అభిప్రాయం చెబుతామన్నారు. సచివాలయం కూల్చివేతను బీజేపీ వ్యతిరేకిస్తుందన్నారు.