అయోధ్య రామ మందిర ప్రాణ ప్రతిష్టలో సచిన్, రజనీకాంత్ నవ్వులు (వీడియో)

దిశ, వెబ్‌డెస్క్: భారత దేశ చరిత్రలో చిరస్మరణీయమైన ఘట్టం ఆవిష్కృతమైంది. కోట్ల మంది ఆరాధ్యుడు రాముడు రామ మందిరంలో ప్రాణ ప్రతిష్టతో కొలువు దీరాడు. ఈ కార్యక్రమానికి భారీ సంఖ్యలో వీఐపీలు హాజరయ్యారు. భారత మాజీ క్రికెటర్ సచిన్ సైతం ఈ కార్యక్రమంలో హాజరై ఆలయ ప్రాంగణంలో తీసిన ఓ వీడియోను ట్విట్టర్ వేదికగా పంచుకున్నారు. ‘అయోధ్యలోని కొత్త రామ మందిరానికి రావడం ఎంతో సంతోషంగా ఉంది. దీని అద్భుతమైన వాస్తు శిల్పం సందర్శించే ఎవరినైనా ఆకట్టుకుంటుంది. శ్రీరాముని ఆశీస్సులు పొందడం సంతోషంగా ఉంది.’ అంటూ ట్వీట్ చేశారు. ఈ ట్వీట్‌కు హీరో రజనీకాంత్‌తో దిగిన సెల్ఫీ వీడియోను జత చేశారు. 

సచిన్ ట్వీట్ చేసిన వీడియోలో రెండు హెలికాప్టర్‌లు పూల వర్షం కురిపించడం కనిపించింది. చివరగా సచిన్ కూర్చుంటూ తన పక్కనే ఉన్న సూపర్ స్టార్ రజనీకాంత్‌తో సెల్ఫీ వీడియో తీసుకున్నారు. ఇద్దరు లెజండరీలు నవ్వుతూ సెల్ఫీ వీడియోకు ఫోజ్ ఇచ్చారు. ఇక, ఈ కార్యక్రమానికి పోలీసులు భారీ భద్రత ఏర్పాట్లు చేశారు. 13 వేల మంది పోలీసులు పహారా కాశారు. 10 వేల సీసీ కెమెరాలు, యాంటీ డ్రోన్లను ఉపయోగించారు. ఎలాంటి అవాంచనీయ ఘటనలు జరగకపోవడంతో పోలీసులు, అధికార యంత్రాంగం ఊపిరి పీల్చుకుంది.