బాలుడి కిడ్నాప్ యత్నం.. కిడ్నాపర్‌ను స్థంభానికి కట్టేసి..

దిశ, కరీంనగర్ సిటీ : నగరంలోని పెద్దమ్మగడ్డ ప్రాంతంలో ఓ బాలుడి కిడ్నాప్ యత్నం కలకలం రేగింది. చాక్లెట్లు కొనిస్తానని చెప్పి పట్టుకెళ్లేందుకు ప్రయత్నం చేయగా, బాలుడు వేసిన కేకలు గమనించిన పరిసర ప్రజలు, యువకుడిని పట్టుకుని చెట్టుకు కట్టేసి చితకబాదారు. ఈ ఘటన కరీంనగర్ జిల్లాలో చోటుచేసుకుంది. వివరాల ప్రకారం.. నగర శివారులోని పెద్దమ్మగడ్డ ప్రాంతంలో షెడ్యూల్ తెగకు చెందిన లకావత్ వెర్షి దంపతులకు చెందిన అరవింద్ అనే పదేళ్ల బాలుడు ఇంటి బయట ఆడుకుంటున్నాడు. ఆ సమయంలో మానేరు నది వైపు గల రోడ్డునుంచి మోహ్మద్ అబ్దుల్ సుమీద్ వాజిద్ అనే యువకుడు వచ్చి చాక్లెట్ కొనిస్తానంటూ, బాలుడ్ని బలవంతంగా లాక్కుపోతుండటంతో అరవింద్ కేకలు వేశాడు.

అది గమనించిన చుట్టూ పక్కలవారు యువకుడిని పట్టుకుని, స్థంభానికి కట్టేసి దేహశుద్ధి చేశారు. అనంతరం పోలీసులకు సమాచారం ఇవ్వగా అక్కడికి చేరుకుని, యువకుడి కట్లు విప్పి పోలీస్ స్టేషన్‌కు తరలించారు. కాగా, పోలీసుల విచారణలో పొంతనలేని సమాధానాలు చెప్పగా, యువకున్ని పూర్తిగా తనిఖీ చేశారు. షర్ట్ జేబులో ఎర్రగడ్డ ఆస్పత్రి ప్రెస్క్రిప్షన్ లభించగా.. మతిస్థిమితం లేని వ్యక్తిగా పోలీసులు భావిస్తున్నారు.