కేటీఆర్ ఇలాకాలో దారుణం : మహిళా ఎస్‌ఐ‌పై టీఆర్ఎస్ నాయకుల దాడి !

దిశ, వెబ్‌డెస్క్ : కేటీఆర్ ఇలాకాలో దారుణం చోటు చేసుకుంది. స్థానిక మహిళా ఎస్‌ఐ‌పై టీఆర్ ఎస్ నాయకులు దాడికి యత్నిచడంతో పోలీసులు మండిపడుతున్నారు. వివరాల్లోకి వెళ్లితే.. టీఆర్ ఎస్ నాయకులు ధాన్యం కొనుగోలు విషయంలో రాష్ట్ర వ్యాప్తంగా అన్ని నియోజక వర్గాలలో ధర్నా నిర్వహించిన విషయం తెలిసిందే. ధాన్యం కొనుగోలు ధర్నాలో టీఆర్ఎస్ పార్టీ ఎమ్మెల్యే రసమయ బాలకిషన్ మోడీపై చేసిన అనుచిత వ్యాఖ్యలను ఖండిస్తూ బీజేపీ నిరసనలు చేపట్టింది. సిరిసిల్ల జిల్లాలో బాలకిషన్ దిష్టి బొమ్మ దగ్ధం చేస్తూ ఆందోళనలు చేపట్టారు. దీంతో టీఆర్ఎస్ నాయకులకు బీజేపీనాయకులకు మధ్య వాగ్వాదం చోటు చేసుకుంది. స్థానిక మహిళా ఎస్సై సంధ్య అక్కడ పరిస్థితి గమనించి గొడవ ఆపుదల చేయడానికి ప్రయత్నిస్తుండగా టీఆర్ఎస్ నాయకులు ఆ మహిళ ఎస్‌ఐ‌పై దాడి చేసే ప్రయత్నం చేశారు. ఇలా కేటీఆర్ ఇలాకాలోనే మహిళ ఎస్ఐ‌పై అధికార పార్టీ నాయకులు దాడికి యత్నిచడం పై పలువురు మండిపడుతున్నారు. విషయం తెలుసుకున్న సీఐ అనిల్ కుమార్ ఘటనా స్థలానికి చేరుకొని అధికార పార్టీ నాయకులకు వార్నింగ్ ఇచ్చారు. ప్రస్తుతం వారు పోలీసుల అదుపులో ఉన్నట్లు సమాచారం.