మెగాస్టార్ చిరంజీవి ఇంటికి పిఠాపురం ఎమ్మెల్యే..కారణం ఏంటంటే?

దిశ,వెబ్‌డెస్క్: ఏపీ సార్వత్రిక ఎన్నికల్లో ఎన్డీయే కూటమి ఘన విజయం సాధించింది. అసెంబ్లీ ఎన్నికల్లో పిఠాపురం నియోజకవర్గం నుంచి ఎమ్మెల్యే అభ్యర్థిగా పోటీ చేసిన జనసేన అధినేత పవన్ కళ్యాణ్ భారీ మెజార్టీతో గెలుపొందిన విషయం తెలిసిందే. గతంలో రెండు చోట్ల ఓటమి చూసిన జనసేనాని ఈ ఎన్నికల్లో రాష్ట్ర రాజకీయాల్లో రికార్డు సృష్టించాడు. పవన్ కళ్యాణ్ గెలుపు పై పలువురు సినీ ప్రముఖులు అభినందనలు తెలిపారు. ఈ క్రమంలో ఏపీ ఎన్నికల ఫలితాల్లో ఘన విజయం సాధించిన జనసేన చీఫ్ పవన్ కళ్యాణ్ ప్రస్తుతం రాజకీయాల్లో బిజీ బిజీగా ఉన్నారు. నిన్నటి వరకు ఢిల్లీ రాజకీయాల్లో బిజీగా ఉన్న పవన్..తాజాగా హైదరాబాద్ చేరుకున్నారు.

నిజానికి పవన్ గెలిచిన వార్త తెలిసిన రోజే మెగా కుటుంబ సభ్యులందరూ కలిసి సంబరాలు చేసుకున్నారు. బిజీ షెడ్యూల్ నుంచి కాస్త గ్యాప్ దొరకడంతో పవన్ ఇప్పుడు తన భార్య పిల్లల్ని తీసుకుని అన్నయ్య చిరంజీవి ఆశీర్వాదం కోసం ఆయన నివాసానికి వెళ్లారు. ఇక ఈ సందర్భంగా మెగాస్టార్ ఇంటి దగ్గర ఉన్న పలువురు మెగా అభిమానులు బాణాసంచా పేల్చి తమ అభిమానాన్ని చాటుకున్నారు. బాబాయిని రామ్ చరణ్ సాదరంగా ఆహ్వానించగా..సోదరిమణులు దిష్టి తీశారు. తల్లి అంజనా దేవీతో పాటు, చిరు దంపతుల కాళ్లు మొక్కి పవన్ ఆశీర్వాదాలు తీసుకున్నారు. కుటుంబసభ్యులతో కలిసి కేక్ కట్ చేశారు. ఇక మెగా కుటుంబ సభ్యులందరూ పవన్ ని సత్కరించబోతున్నట్లు గా తెలుస్తోంది. జనసేనాని అన్న చిరంజీవి ఇంటికి వెళుతున్న ఆ వీడియో ప్రస్తుతం సోషల్ మీడియాలో వైరల్ అవుతోంది.