రోడ్లపై పశువుల సంచారం.. వాహనదారుల తిప్పలు

దిశ, కారంపూడి: కారంపూడి పట్టణ పరిధిలో మెయిన్ రోడ్డు పై నిత్యం వేలాది వాహనాలు తిరిగే రహదారులపై పశువులు యథేచ్ఛగా తిరగడంతో వాహనదారులు నానా అవస్థలు పడుతున్నారు. చెక్ పోస్ట్ సెంటర్ నుంచి నాగులేటి బ్రిడ్జి వరకు సమీప ప్రాంతాల్లో ఉదయం, రాత్రి సమయాల్లో రహదారిపై అడ్డదిడ్డంగా పశువులు సంచరించడంతో వాహనదారులు తీవ్ర ఇబ్బందులు ఎదుర్కొంటున్నారు. రద్దీ ప్రాంతాల్లో వాహనాల మధ్య నుంచి వెళ్లడంతో ప్రయాణికులు భయభ్రాంతులకు గురవుతున్నారు. సంబంధిత అధికారులు స్పందించి పశువులను రోడ్డుపై సంచరించకుండా చర్యలు చేపట్టాలని వాహన చోదకులు కోరుతున్నారు.