దిశ, వెబ్‌డెస్క్: ఆంధ్రప్రదేశ్ డిప్యూటీ సీఎం పవన్ కళ్యాణ్ నియోజకవర్గం పిఠాపురంలో మాజీ ముఖ్యమంత్రి, వైఎస్‌ఆర్‌ కాంగ్రెస్‌ పార్టీ అధినేత వైఎస్ జగన్మోహన్‌రెడ్డి ఈరోజు (శుక్రవారం) పర్యటించనున్నారు. కొద్ది సేపట్లో ఆయన పిఠాపురం చేరుకోనున్నారు. ఈ పర్యటనలో వరదల వల్ల తీవ్రంగా నష్టపోయిన ప్రజలను వైఎస్ జగన్ పరామర్శించనున్నారు. ముఖ్యంగా ఏలేరు వరదలతో అతలాకుతలమైన గ్రామాల్లో జగన్ పర్యటన కొనసాగనుంది.
పర్యటన కొనసాగనుందిలా..
ఇప్పటికే తాడేపల్లిలోని తన నివాసం నుంచి బయలుదేరిన వైఎస్ జగన్ 10:30 గంటల వరకు పిఠాపురం చేరుకుంటారు. అక్కడినుంచి పాత ఇసుకపల్లి మీదుగా మాధవపురం వెళ్లతారు. అక్కడ వరద బాధితులను పరామర్శించి మళ్లీ యూ కొత్తపల్లి మండలం నాగులపల్లి చేరుకుంటారు. అక్కడినుంచి రమణక్కపేట బయలుదేరి వెళ్లి ఆ ప్రాంతంలోని బాధితులను పరామర్శిస్తారు. ఆ తర్వాత పిఠాపురం చేరుకుని మధ్యాహ్నం అక్కడి నుంచి తిరిగి తాడేపల్లికి తిరుగు ప్రయాణం అవుతారు.
కాగా.. కాగా..ఇప్పటికే విజయవాడలోని ముంపు ప్రాంతాల్లోనూ జగన్ పర్యటన కొనసాగింది. వరదలు వస్తాయని తెలిసినా.. ముందస్తుగా ప్రజలను అప్రమత్తం చేయడంలో ప్రభుత్వం ఫెయిల్ అయిందని, ప్రజలను సురక్షిత ప్రాంతాలకు తరలించడంలో ప్రభుత్వం ఫెయిల్ అయిందని ఆయన తీవ్ర విమర్శలు గుప్పిస్తున్నారు. ఈ క్రమంలో అసెంబ్లీ ఎన్నికల అనంతరం తొలిసారి జనసేన అధినేత, ఏపీ డిప్యూటీ సీఎం పవన్ కళ్యాణ్ నియోజకవర్గమైన పిఠాపురంలో ఆయన పర్యటించడం ప్రస్తుతం ఆసక్తికరంగా మారింది.