Vellampally: ఆర్యవైశ్యులకు చంద్రబాబు ఏం చేశారు!

దిశ, డైనమిక్ బ్యూరో : ఆర్యవైశ్యుల పట్ల చంద్రబాబు కపట ప్రేమ ప్రదర్శిస్తున్నారని మాజీమంత్రి వెల్లంపల్లి శ్రీనివాస్ అన్నారు. మరో కొన్ని నెలల్లో ఎన్నికలు రానున్న నేపథ్యంలోనే వైశ్యులపట్ల కపట ప్రేమ ప్రదర్శిస్తున్నారని ఆయన ఆగ్రహం వ్యక్తం చేశారు. తాడేపల్లి వైసీపీ కేంద్ర కార్యాలయంలో ఆదివారం మీడియాతో మాట్లాడుతూ టీడీపీ హయాంలో ఆర్యవైశ్యులకు చంద్రబాబు ఏం చేశారో సమాధానం చెప్పాలని డిమాండ్ చేశారు. చంద్రబాబుది వైశ్యుల పట్ల కపట ప్రేమ అని, కొంతమంది ఆర్యవైశ్యులు టీడీపీలో చేరి ఇష్టానుసారం మాట్లాడటం సరికాదని హితవు పలికారు. ఆర్యవైశ్య సామాజిక వర్గానికి చెందిన టీజీ వెంకటేశ్, అంబికా కృష్ణ, కవిత వంటి నేతలు టీడీపీలో ఎందుకు ఇమడలేకపోయారని చెప్పారు. వైసీపీ ప్రభుత్వం వచ్చిన తర్వాత ఆర్యవైశ్యులకు అన్ని రకాలుగా గుర్తింపు వచ్చిందని పేర్కొన్నారు.

ఆర్య వైశ్యులకు సంబంధించి దేవాదాయశాఖలో ఉన్న ఆస్తులను ఆర్యవైశ్యుల ట్రస్ట్‌కు ఇచ్చిన గొప్ప నాయకుడు సీఎం వైఎస్ జగన్ అని వెల్లంపల్లి కొనియడారు. ఆర్యవైశ్యుల మనోభావాల మేరకు చింతామణి నాటకాన్ని రద్దు చేశారని గుర్తు చేశారు. టీడీపీ అధినేత చంద్రబాబు కావాలనే ఆర్యవైశ్య మహాసభపై దురుద్దేశపూర్వకంగా విమర్శలు చేయిస్తున్నారని విమర్శించారు. ఆర్యమహాసభపై విమర్శలు సరికాదని అన్నారు. ఒకవేళ ఏవైనా సమస్యలు ఉంటే వాటిని సరిదిద్దుకుని అందరినీ ఏకతాటిపైకి తీసుకుని వస్తామని మాజీమంత్రి వెల్లంపల్లి శ్రీనివాస్ పేర్కొన్నారు.