ఏపీ ప్రజలకు సీఎం జగన్ శుభాకాంక్షలు

దిశ, వెబ్ డెస్క్: ఏపీ ప్రజలకు సీఎం జగన్ మోహన్ రెడ్డి నూతన సంవత్సర శుభాకాంక్షలు తెలిపారు. 2024లో ప్రతి కుటుంబంలో ఆనందాలు, అభివృద్ధి కాంతులు వెల్లివిరియాలని ఆకాంక్షించారు. అన్ని వర్గాలను అభివృద్ధిలో నడిపిన ప్రభుత్వానికి, ప్రజలకు 2024లో దైవానుగ్రహం సంపూర్ణంగా లభించాలని సీఎం జగన్ కోరుకున్నారు. కొత్త సంవత్సరంలోకి అడుగు పెడుతున్నామని, అన్ని ప్రాంతాలు, అన్ని సామాజిక వర్గాలు సుస్థిరమైన అభివృద్ధి పథంలో ప్రయాణించేందుకు ప్రభుత్వం కృషి చేస్తుందని సీఎం జగన్ పేర్కొన్నారు.

కాగా నూతన సంవత్సరంలో ఏపీ వ్యాప్తంగా వృద్ధులు అందుకుంటున్న వైఎస్సార్ ఆసరా పింఛన్ల డబ్బులు పెరగనున్నాయి. ఇప్పటి వరకూ రూ. 2500 ఇస్తున్న ప్రభుత్వం కొత్త సంవత్సరం సందర్భంగా రూ.3 వేలకు పెంచుతోంది. పాదయాత్రలో జగన్ హామీ ఇచ్చిన మేరకు సోమవారం అవ్వాతాతలు రూ.3 వేలు పింఛన్ అందుకోనున్నారు. సోమవారం ఉదయమే వృద్ధులకు పెరిగిన పింఛన్ డబ్బులను అందించేందుకు వార్డు వాలంటీర్లు, ప్రభుత్వ యంత్రాంగం సిద్ధమైంది.