స్టిక్కర్ల వార్‌లోకి ఉద్యోగులు.. తమ సమస్యలు పరిష్కరించాలంటూ స్టిక్కర్లతో నిరసన

దిశ, డైనమిక్ బ్యూరో : ఆంధ్రప్రదేశ్‌లో ప్రస్తుతం స్టిక్కర్ వార్‌ నడుస్తోంది. వైసీపీ మా నమ్మకం నువ్వే జగన్ పేరుతో వైసీపీ ప్రజల్లోకి దూసుకెళ్తుంటే..మా నమ్మకం పవన్ అంటూ జనసేన నిరసనలకు దిగుతుంది. మరోవైపు టీడీపీ సైతం ఈ స్టికర్ల వార్‌పై నిరసన తెలుపుతుంది. మా నమ్మకం కాదు దరిద్రం శని అంటూ సోషల్ మీడియా వేదికగా టీడీపీ తిట్టిపోస్తుంది. ఇలాంటి తరుణంలో ఉద్యోగ సంఘాలు సైతం స్టికర్ల వార్‌కు దిగారు. ప్రభుత్వ ఉద్యోగుల సమస్యలు పరిష్కరించాలని కోరుతూ అమరావతి జేఏసీ పిలుపుమేరకు రాష్ట్రవ్యాప్తంగా మలివిడత నిరసన కార్యక్రమాలు కొనసాగుతున్నాయి. మలివిడత నిరసన కార్యక్రమంలో భాగంగా నేడు స్టిక్కర్లు అతికించి నిరసన తెలిపారు. దీనిలో భాగంగా ఈరోజు మచిలీపట్నంలోని ప్రభుత్వ కార్యాలయాల్లో స్టిక్కర్ అతికించే కార్యక్రమాన్ని చేపట్టారు. మరోవైపు ఏపీ జేఏసీ అమరావతి యూనియన్ నాయకులు ప్రభుత్వ కార్యాలయాలలో పలు డిమాండ్లతో కూడుకున్న స్టిక్కర్లను అతికించి తమ నిరసన గళాన్ని వినిపిస్తున్నారు. అలాగే తాము ఎందుకు నిరసనలు ప్రజలకు సైతం వివరిస్తున్నారు. ఈ సందర్భంగా తాము చేస్తున్న నిరసనలకు మిగిలిన ఉద్యోగ సంఘాలు సంఘీభావం తెలపాలని కోరుతున్నారు.