BREAKING: ఎన్నికల వేళ CM జగన్‌కు మరో బిగ్ షాక్.. మరో ఎమ్మెల్యే రాజీనామా..!
అనంతపురం జిల్లాలో వైసీపీకి బిగ్ షాక్ తగిలింది. ..
దిశ, వెబ్ డెస్క్: అనంతపురం జిల్లాలో వైసీపీకి బిగ్ షాక్ తగిలింది. ఆ పార్టీకి రాయదుర్గం ఎమ్మెల్యే కాపు రాంచంద్రారెడ్డి రాజీనామా చేశారు. వచ్చే ఎన్నికల్లో తనకు టికెట్ ఇవ్వడం లేదని జగన్ స్పష్టంచేయడంతో ఆయన ఈ నిర్ణయం తీసుకున్నారు. అయితే సీఎం జగన్ ఎక్కడి నుంచైనా పోటీకి అవకాశం ఇస్తే అక్కడి నుంచి బరిలోకి దిగుతానని ఆశాభావం వ్యక్తం చేశారు. అవకాశం ఇవ్వకపోతే ఇండిపెండెంట్‌గా పోటీ చేస్తానని వెల్లడించారు. తాను మాత్రమే కాదని, భార్య కూడా పోటీ చేస్తారని తెలిపారు. సీఎం జగన్ నమ్మించి గొంతు కోశారని ఆవేదన వ్యక్తం చేశారు. 2014, 2019లో తనకు మంత్రి పదవి ఇస్తానని ఆశ చూపారని.. ఆ తర్వాత ఇవ్వలేదని వాపోయారు. వైఎస్ రాజశేఖర్ రెడ్డి కుంటుంబంపై ఉన్న ప్రేమతో తాము జగన్ వెంట నడిచామని తెలిపారు. జగన్ జైలుకు వెళ్లిన సమయంలోనూ ఆయన వెంటే ఉన్నామని గుర్తు చేశారు. కానీ తనకు వచ్చే ఎన్నికల్లో టికెట్ ఇవ్వరని అసలు ఊహించలేదని పేర్కొన్నారు. తనపై నియోజకవర్గం ప్రజలకు, కార్యకర్తలకు చాలా నమ్మకం ఉందని, అందుకే తాను, తన భార్య వచ్చే ఎన్నికల్లో పోటీ చేస్తామని కాపు రాంచంద్రారెడ్డి స్పష్టం చేశారు.