బన్నీ జర్నీ ఇన్ వన్ ఫ్రేమ్

అల్లు అర్జున్ … గంగోత్రి సినిమాతో మెగా ఫ్యామిలీ హీరోగా టాలీవుడ్ ఎంట్రీ ఇచ్చాడు. తర్వాత వచ్చిన ఆర్య, బన్నీ, హ్యాపీ సినిమాలతో స్టైలిష్ స్టార్ అనిపించుకున్నాడు. దేశ ముదురులో రోరింగ్ యాక్షన్ చేసిన బన్నీ సపరేట్ ఫ్యాన్ ఫాలోయింగ్ పెంచుకున్నాడు. ఆర్య-2లో యాక్టింగ్‌తో విమర్శకుల నుంచి కూడా ప్రశంసలు అందుకున్నాడు. ఆ తర్వాత వేదం, జులాయి, సన్నాఫ్ సత్యమూర్తి, రేసు గుర్రం లాంటి సినిమాలతో తన స్థాయిని పెంచుకున్నాడు. రుద్రమ దేవిలో గోన గన్నారెడ్డిగా మెప్పించిన బన్నీ సరైనోడు‌తో మరోమాస్ ఎంటర్టైన్మెంట్ ఇచ్చాడు. అయితే అనంతరం వచ్చిన దువ్వాడ జగన్నాథం, నా పేరు సూర్య చిత్రాలు ఆశించిన ఫలితాలు ఇవ్వలేదు.

దీంతో లాంగ్ గ్యాప్ తీసుకున్న అల్లువారి అబ్బాయి…. అల వైకుంఠపురంలో సినిమాతో రికార్డ్ బ్రేకింగ్ హిట్ కొట్టాడు. తన కెరియర్ లో ఇండస్ట్రీ హిట్ అందుకున్నాడు. పైగా తండ్రి అల్లు అరవింద్ గీతా ఆర్ట్స్ బ్యానర్‌లో ఈ సినిమా రావడం బ్లాక్ బస్టర్ సాధించడంతో ఫుల్ హ్యాపినెస్‌తో ఉన్నాడు. దీంతో సక్సెస్ మీట్‌లు, విజయయాత్రలు చేస్తూ ప్రేక్షకులకు ధన్యవాదాలు చెప్తున్నారు. ఈ సినిమా సక్సెస్ మీట్‌ల గురించి ప్రత్యేకంగా మాట్లాడుకోవాలి. ఒకటా? రెండా? మూవీ రిలీజైన రోజు నుంచి ఇప్పటివరకు అదే మూడ్‌లో ఉన్నారు. మొన్నకు మొన్న టాలీవుడ్ డైరెక్టర్స్ అందరినీ పిలిచి సక్సెస్ పార్టీ ఇచ్చారు. దర్శకేంద్రుడు రాఘవేంద్ర రావు నుంచి టాలీవుడ్‌కు ఇప్పుడే ఎంట్రీ ఇచ్చిన డైరెక్టర్ వరకు ప్రతీ ఒక్కరినీ పార్టీకి ఆహ్వానించారు. ఇందుకు సంబంధించిన ఫొటోను ఫ్రమ్ ద లెజెండ్ టు లేటెస్ట్ డైరెక్టర్ అంటూ ట్వీట్ చేశాడు. దర్శకులంతా ఒకే చోట ఉండడంతో ఈ ఫోటో కాస్త వైరల్ అయింది.

ఈ పార్టీలోనే బన్నీ తీసుకున్న మరో ఫొటోను స్పెషల్‌గా పోస్ట్ చేశాడు. రాఘవేంద్ర రావు, త్రివిక్రమ్, అల్లు అర్జున్ ఒకే ఫ్రేమ్‌లో ఉన్న ఫొటోను షేర్ చేసిన బన్నీ గంగోత్రి నుంచి ‘అల వైకుంఠపురంలో’ వరకు మై జర్నీ ఇన్ వన్ ఫ్రేమ్ అంటూ పోస్ట్ పెట్టాడు. ఈ పిక్‌ను చూసిన అభిమానులు ఆనందం వ్యక్తం చేశారు. ఇలాంటి మూవీస్ మరిన్ని కోరుకుంటున్నామని చెబుతున్నారు.