తిరుమల పార్వేటి మండపం వద్ద ఏనుగుల హల్‌చల్

దిశ, తిరుమల: తిరుమలలో ఏనుగులు హల్ చల్ సృష్టించాయి. వెంకటేశ్వర స్వామి వారికి సంబంధించిన పార్వేటి మండపం వద్దకు ఆదివారం వేకువజామున వచ్చిన ఏనుగులు పరిసర ప్రాంతాలలో కలియతిరిగాయి. పార్వేటి మండపం వద్ద గల ఎర్రచందనం వద్దగల కంచెలను ధ్వంసం చేసి లోపలికి ప్రవేశించాయి. ఐదేళ్ల క్రితం ఇదే ప్రాంతంలో ఎర్ర చందనం, శ్రీగంధం చెట్లను టీటీడీ ఫారెస్ట్ అధికారులు ఏర్పాటు చేశారు. ప్రస్తుతం ఏపుగా పెరుగుతున్న మొక్కలను ఏనుగులు ధ్వంసం చేశాయి. విషయం తెలుసుకున్న టీటీడీ ఫారెస్ట్ అధికారులు ఘటనా స్థలానికి చేరుకున్నారు. ఏనుగులు సంచరించిన ప్రాంతాన్ని వాటి కాలిముద్రల ఆధారంగా గుర్తించారు. మొత్తం ఏడు ఏనుగులు దాడికి పాల్పడినట్లుగా అధికారులు తెలిపారు. ఈ ప్రాంతంలో ఏనుగు సంచారం‌పై నిఘా ఏర్పాటు చేస్తున్నట్లు తెలిపారు.