ఢిల్లీలో అగ్ని ప్రమాదం: ఇద్దరు పిల్లలు సహా నలుగురు మృతి

దిశ, నేషనల్ బ్యూరో: ఢిల్లీలో ఘోర అగ్ని ప్రమాదం చోటు చేసుకుంది. ఓ నివాస భవనంలో మంటలు చెలరేగగా.. ఇద్దరు పిల్లలు సహా నలుగురు మరణించారు. పోలీసులు తెలిపిన వివరాల ప్రకారం..షాహదారాలోని శాస్త్రి నగర్ ప్రాంతంలోని ఓ నాలుగంతస్తుల భవనంలో గురువారం తెల్లవారు జామున మంటలు వ్యాపించాయి. ఈ ఘటనలో ఇద్దరు పిల్లలు సహా వారి తల్లిదండ్రులు మృతి చెందారు. దీనిపై సమాచారం అందిన వెంటనే ఘటనా స్థలానికి చేరుకున్న పోలీసులు సహాయక చర్యలు చేపట్టారు. మంటలను అదుపులోకి తీసుకొచ్చేందుకు ప్రయత్నించారు. ఈ క్రమంలోనే పొగ భారీగా వ్యాపించడం వల్ల ఊపిరాడక నలుగురు మృతి చెందినట్టు తెలుస్తోంది. మృతులను మనోజ్ (30), అతని భార్య సుమన (28), ఐదు, మూడేళ్ల వయసున్న ఇద్దరు బాలికలుగా గుర్తించారు. దీనిపై కేసు నమోదు చేసిన పోలీసులు దర్యాప్తు చేపట్టారు. మృత దేహాలను హెడ్గెవార్ ఆస్పత్రికి తరలించారు. అయితే పార్కింగ్ స్థలం నుంచే మంటలు వ్యాపించినట్టు భావిస్తున్నారు.