HYD: బాలాపూర్‌లో గంజాయి స్మగ్లర్ అరెస్ట్

దిశ, తెలంగాణ క్రైం బ్యూరో: గంజాయి స్మగ్లింగ్ చేస్తున్న వ్యక్తిని ఎల్బీనగర్ ఎస్ఓటీ అధికారులు బాలాపూర్ పోలీసులతో కలిసి అరెస్ట్ చేశారు. నిందితుడి నుంచి 10 కిలోల గంజాయి, రెండు సెల్ ఫోన్లను స్వాధీనం చేసుకున్నారు. తూర్పు గోదావరి జిల్లా రంపచోడవరం నివాసి కురుసం రాజేష్ దొర (23) తేలికగా డబ్బు సంపాదించేందుకు కొంతకాలం క్రితం గంజాయి దందా మొదలు పెట్టాడు. ఈ క్రమంలో ఆంధ్రప్రదేశ్‌లోని సీలేరు నుంచి 10కిలోల గంజాయి కొని హైదరాబాద్ తీసుకొచ్చాడు. బాలాపూర్ ప్రాంతంలోని శివాజీ చౌక్ వద్ద దానిని అమ్మటానికి ప్రయత్నిస్తుండగా సమాచారం అందుకున్న పోలీసులు దాడి చేసి అరెస్ట్ చేశారు. తదుపరి దర్యాప్తు నిమిత్తం నిందితున్ని బాలాపూర్ పోలీసులకు అప్పగించారు.