‘వస్తున్నా మీ కోసం’ పాదయాత్రకు 8 ఏళ్లు

దిశ, ఏపీ బ్యూరో: తెలుగుదేశం పార్టీ జాతీయ అధ్యక్షులు నారా చంద్రబాబునాయుడు ‘వస్తున్నా మీకోసం’ పాదయాత్రకు నేటితో 8 ఏళ్లు పూర్తయ్యాయి. ఈ సందర్భాన్ని పురస్కరించుకుని తెలుగుదేశం పార్టీ జాతీయ కార్యాలయంలో కార్యకర్తలు కేక్ కట్ చేసి ఆనాటి స్మృతులను గుర్తుచేసుకున్నారు. 2,817 కిలోమీటర్ల సుధీర్ఘ యాత్రను 63 ఏళ్ల వయసులో కూడా చంద్రబాబునాయుడు అలుపులేకుండా పూర్తిచేసి ప్రజలలో చైతన్యం నింపినట్లు తెలిపారు. ప్రజల కష్టాలను తెలుసుకుని రైతు రుణమాఫీతో పాటు అనేక హామీలు అమలు చేసినట్లు పేర్కొన్నారు. పాదయాత్రలో ఇచ్చిన హామీలేగాక ఇవ్వని హామీలను కూడా నెరవేర్చారని ఈ సందర్భంగా కార్యకర్తలు వెల్లడించారు. కార్యక్రమంలో తెలుగుదేశం పార్టీ రాష్ట్ర మీడియా కో ఆర్డినేటర్ దారపనేని నరేంద్ర, పార్టీ నేతలు నాదెండ్ల బ్రహ్మం చౌదరి, కొల్లూరి కుమారస్వామి, పొన్నూరు వంశీ పాల్గొన్నారు.