ఉమ్మడి రంగారెడ్డి జిల్లాలో మరో ఏడు కేసులు

దిశ, రంగారెడ్డి: ఉమ్మడి రంగారెడ్డి జిల్లాలో కరోనా కలకలం సృష్టిస్తోంది. వికారాబాద్ జిల్లా యాలాల మండలం దౌలాపూర్ గ్రామానికి చెందిన ముగ్గురు వ్యక్తులకు కరోనా పాజిటివ్ నిర్ధారణ అయినట్లు యాలాల మండల వైద్యాధికారి తెలిపారు. ముంబాయి నుంచి వీరు కర్నాటకలోని యాద్గిరి మీదుగా రాష్ట్రానికి వచ్చారు. 22 రోజుల క్రితం గురుమిట్కల్ వద్ద ఏర్పాటు చేసిన క్వారంటైన్ సెంటర్‌లో ఉన్నారు. ఆదివారం వీరు దౌలాపూర్‌కు చేరుకున్నారు. అయితే ఈ ముగ్గురికి కరోనా పాజిటివ్ వచ్చిన విషయం వికారాబాద్ జిల్లా వైద్యాధికారికి కర్ణాటక రాష్ట్ర యాద్గిర్ జిల్లా వైద్య అధికారి తెలిపారు. దీంతో ఇక్కడి అధికారులు చేసిన వైద్య పరీక్షల్లో వీరికి కరోనా పాజిటివ్ వచ్చినట్లు స్పష్టం చేశారు. అదేవిధంగా మొయినాబాద్ అజీజ్ నగర్‌లో మరో నాలుగు కరోనా పాజిటివ్ కేసులు నమోదైనట్లు రంగారెడ్డి జిల్లా వైద్యాధికారులు తెలిపారు.