TG Govt.: హెచ్ఎండీఏ లిమిట్స్‌పై సర్కార్ ఫోకస్.. డెవలప్‌మెంట్‌కు మాస్టర్ ప్లాన్-2050
దిశ, తెలంగాణ బ్యూరో: హెచ్ఎండీఏ పరిధిని విస్తరించిన సర్కార్ అన్ని రకాల అభివృద్ధి కార్యక్రమాలపై దృష్టి సారించింది. మరో 25 ఏండ్ల అభివృద్ధిని దృష్టిలో పెట్టుకుని మాస్టర్ ప్లాన్-2050 రూపొందిస్తోంది. గతంలో ఎనిమిది జిల్లాల్లో ఉన్న హెచ్ఎండీఏను రీజినల్ రింగ్ రోడ్డు(త్రిపుల్ ఆర్) 11 జిల్లాల పరిధికి విస్తరించింది. ఈ ప్రాంతాల్లో ఏరకమైన అభివృద్ధి జరగాలి? ఎలాంటి జోనింగ్ విధానం ఉండాలి? అనే విషయాలను 2050 మాస్టర్ ప్లాన్‌లో పొందుపర్చనున్నారు. వీటిలో ప్రజా రవాణకు సంబంధించిన కాంప్రహెన్సివ్ మొబులిటీ ప్లాన్(సీఎంపీ), ఆర్థికపరమైన అభివృద్ధికి సంబంధించిన ఎకనామిక్ డెవలప్‌మెంట్ ప్లాన్(ఈడీపీ), నీటి వనరులు, పార్కులు, గ్రీనరీ డెవలప్‌మెంట్‌కు సంబంధించిన బ్లూగ్రీన్ ఇన్ఫ్రాస్ట్రక్చర్ ప్లాన్ ఆధారంగా మాస్టర్ ప్లాన్ రూపొందించాలని ప్రభుత్వం నిర్ణయించింది. అందుకు సంబంధించిన కార్యాచరణను హెచ్ఎండీఏ ప్రారంభించింది.
లీ అసోసియేట్స్‌కు మొబులిటీ ప్లాన్..
మాస్టర్ ప్లాన్-2050లో భవిష్యత్‌ను దృష్టిపెట్టుకుని ప్రజా రవాణ, ప్రైవేటు రవాణ మార్గాల అభివృద్ధి కోసం నేషనల్ అర్బన్ ట్రాన్స్‌పోర్ట్ పాలసీ (ఎన్యూడీపీ)2006/2014కు లోబడి ఆచరణాత్మకమైన దీర్ఘకాలిక ప్రణాళికలను రూపొందించే బాధ్యతను లీ అసోసియేట్స్‌కు అప్పగించారు. హెచ్ఎండీఏ, జీహెచ్ఎంసీ, హెచ్ఎంఆర్ఎల్ విభాగాలు అమలు చేస్తున్న రవాణా కార్యక్రమాలను పరిగణనలోకి తీసుకుని ట్రాఫిక్ సమస్యకు పరిష్కారం, ఎక్కడెక్కడ ఫ్లైఓవర్లు, అండర్ పాసులు, గ్రిడ్ రోడ్లు, రేడియల్ రోడ్ల నిర్మాణం, మెట్రోరైలు ప్రాజెక్టులను ఎక్కడికి పొడిగించాలి? ఎయిర్‌పోర్ట్ అనుసంధానం రోడ్ల నిర్మాణం వంటి అంశాలను ప్లాన్‌లో ఉండనున్నాయి. త్రిపుల్‌ఆర్ వరకు అభివృద్ధిని దృష్టిలో పెట్టుకుని స్వల్పకాలిక, మధ్యకాలిక, దీర్ఘకాలిక ప్రణాళికలను రూపొందిస్తున్నారు. పీక్ అవర్ పర్ డైరెక్షన్ ట్రాఫిక్ (పీహెచ్పీడీటీ) రవాణా మార్గాలు 2030, 2040, 2050 ఆధారంగా ప్లాన్ చేయనున్నారు. దీనికి సంబంధించిన పనులు ఏడాది కాలంలో పూర్తి చేయాలని నిర్ణయించారు. కానీ మరో మూడు నెలలు (జూన్ 30) పొడిగించారు.
క్రిసిల్ ప్రైవేటు లిమిటెడ్‌కు ఎకనామిక్ డెవలప్‌మెంట్ ప్లాన్..
ప్రపంచంలోని పది నగరాల జాబితాలో హైదరాబాద్ ఉండే విధంగా ఎకనామిక్ డెవలప్‌మెంట్ ఫ్లాన్ రూపొందించాలని ప్రభుత్వం నిర్ణయించింది. హైదరాబాద్ మెట్రోపాలిటన్ ఏరియాలో భవిష్యత్‌లో ఎకనామిక్ డెవలప్‌మెంట్ ఎలా ఉండాలనే దానిపైనే ఫోకస్‌గా పనిచేయాలని నిర్ణయించారు. ఔటర్ రింగ్ రోడ్డు(ఓఆర్ఆర్) లోపల ఆర్థికాభివృద్ధి ఎలా ఉండాలి? ఓఆర్ఆర్ నుంచి త్రిపుల్‌ఆర్ మధ్య ఎలా ఉండాలి? ఐటీ పార్కులు, పారిశ్రామిక కారిడార్లు, జాతీయ రహదారులకు అనుసంధానంగా ఎలాంటి పరిశ్రమలు ఉండాలి? అనే అంశాలపై ముసాయిదా ప్లాన్ రూపొందించే బాధ్యతను క్రిసిల్ ప్రైవేటు లిమిటెడ్ సంస్థకు అప్పగించారు.
ఎన్సీపీఈకి బ్లూ గ్రీన్ ప్లాన్..
రవాణా ఆధారిత ప్రాజెక్టులు, ఆర్థికాభివృద్ధితో పాటు బ్లూ, గ్రీన్ మౌలిక సదుపాయాల కల్పన కూడా ముఖ్యమే. వాతావరణంలో వచ్చే మార్పులకనుగుణంగా వీటిని అభివృద్ధి చేయాల్సి ఉంటుంది. పట్టణీకరణ పెరుగుతున్న తరుణంలో గ్రీన్ స్పేస్‌కు ప్రాధాన్యత ఏర్పడింది. చెరువులు, కుంటల పరిరక్షణ కూడా సవాల్‌తో కూడుకున్నది. ఈ ప్రణాళికలో నీటి వనరులను మ్యాపింగ్ చేయనున్నారు. వాతావరణ మార్పుల ఆధారంగా సంభవించే వైఫరిత్యాలు, వరద ముప్పు నివారణ చర్యలు, లేక్ ఫ్రంట్, రివర్ ఫ్రంట్, కాలువల గుర్తించే కార్యక్రమాలను చేపట్టాల్సి ఉంటుంది. నీటివనరుల ఆధారంగా పార్కుల ఏర్పాటుతో పాటు జీవవైవిధ్యాన్ని పరిరక్షించే విధంగా ప్రజలకు ఆహ్లాదానిచ్చే రీక్రియేషన్ జోన్లు వంటి వాటిని మాస్టర్ ప్లాన్‌లో పొందుపర్చనున్నారు. ఈ బ్లూ, గ్రీన్ ఇన్ఫ్రాస్ట్రక్చర్ ప్రణాళిక రూపొందించే బాధ్యతను ఎన్సీపీఈ ఇన్ఫ్రాస్ట్రక్చర్ ఇండియా ప్రైవేటు లిమిటెడ్‌కు అప్పగించారు.
జియో బేస్ మ్యాప్.. ల్యాండ్ యూజ్..
హెచ్ఎండీఏకు సంబంధించిన అన్ని రకాల ఆస్తులను జియో బేస్ మ్యాప్‌లో పొందుపర్చనున్నారు. కాంప్రహెన్సివ్ మొబులిటీ ప్లాన్(సీఎంపీ), ఆర్థికపరమైన అభివృద్ధికి సంబంధించిన ఎకనామిక్ డెవలప్‌మెంట్ ప్లాన్(ఈడీపీ), నీటి వనరులు, పార్కులు, గ్రీనరీ డెవలప్‌మెంట్‌కు ప్రణాళికలను సైతం మ్యాప్‌లో పొందుపర్చనున్నారు. బేస్ మ్యాప్ ఆధారంగానే ల్యాండ్ యూజ్ ప్లానింగ్ చేయనున్నట్టు అధికారులు చెబుతున్నారు. జూన్ వరకు మాస్టర్ ప్లాన్‌కు సంబంధించిన గ్రౌండ్ వర్క్ పూర్తికానుందని, మాస్టర్ ప్లాన్ తయారు చేయడానికి టెండర్లు కూడా పిలవనున్నట్టు వివరించారు.
