సాలిడరిటీ కప్‌కు కరోనా అడ్డంకి
దిశ, స్పోర్ట్స్: క్రికెట్ సౌతాఫ్రికా (సీఎస్ఏ) 3టీ ఫార్మాట్‌లో నిర్వహించనున్న సాలిడరిటీ కప్‌కు కరోనా అడ్డంకిగా మారింది. జూలై 18న సెంచూరియన్‌లోని సూపర్ స్పోర్ట్స్ పార్క్‌లో ఈ మ్యాచ్ నిర్వహించనుంది. ఇందులో పాల్గొనే ఆటగాళ్లు, కోచ్‌లు, సహాయక, స్టేడియం సిబ్బంది, అంపైర్లకు కరోనా పరీక్షలు నిర్వహించారు. ఈ టెస్టుల్లో ఆరుగురికి కరోనా పాజిటివ్‌గా నిర్ధారణ అయ్యింది. ఇందులో ఆటగాళ్లు ఎవరూ లేరని సీఎస్ఏ స్పష్టం చేసింది. ఇప్పటికే ఒకసారి వాయిదా పడిన ఈ ఎగ్జిబిషన్ మ్యాచ్‌ను ఈసారి కచ్చితంగా జరిపి తీరుతామని సీఎస్ఏ చెబుతున్నది. కీలకమైన సభ్యులు ఎవరికీ కరోనా సోకలేదని, పరీక్షల్లో నిర్థారించిన వారి బదులుగా ఇతరులను తీసుకుంటామని, అయితే వారికి కూడా పరీక్షలు నిర్వహించిన తర్వాతే వేదికకు అనుమతిస్తామని సీఎస్ఏ చెబుతున్నది. ఈ మ్యాచ్‌ను ఆదివారం స్టార్ స్పోర్ట్స్ ప్రత్యక్ష ప్రసారం చేయనున్నది.
