‘కేసీఆర్ ను గద్దె దింపడానికి పోరుబాట పడతాం’
దిశ, శేరిలింగంపల్లి: శేరిలింగంపల్లి నియోజకవర్గంలో కాంగ్రెస్ పార్టీ 137వ ఆవిర్భావ దినోత్సవ వేడుకలను ఆ పార్టీ శ్రేణులు ఘనంగా జరుపుకున్నారు. మంగళవారం చందానగర్ లో ఏర్పాటు చేసిన ఈ వేడుకల్లో పలువురు కాంగ్రెస్ పార్టీ నాయకులు మాట్లాడుతూ.. దేశానికి స్వాతంత్య్రం తీసుకొచ్చి పేదల బతుకులని మార్చింది కాంగ్రెస్ పార్టీనేనని అన్నారు. పేద, బడుగు, బలహీన వర్గాల కోసం నిరంతరం పోరాడుతుందని, రాష్ట్రంలో అరాచక పాలన నడుస్తోందని, కేసీఆర్ ను గద్దె దించడమే లక్ష్యంగా కాంగ్రెస్ శ్రేణులు పోరుబాట పడతారని అన్నారు.
రైతుల పక్షాన పోరాటం చేస్తున్న టీపీసీసీ అధ్యక్షుడిని పోలీసులు అడ్డుకోవడం హేయమైన చర్యగా అభివర్ణించారు. అనంతరం ప్రజా నాయకుడు, పేదల పెన్నిధి పీజేఆర్ 14 వ వర్ధంతి సందర్బంగా ఆయన విగ్రహానికి పూలమాలలు వేసి ఘనంగా నివాళులు అర్పించారు. ఈ కార్యక్రమంలో కాంగ్రెస్ పార్టీ నాయకులు మహిపాల్ యాదవ్, రఘునందన్ రెడ్డి, ఇలియాస్ షరీఫ్, సురేష్ నాయక్ తదితరులు పాల్గొన్నారు.
