వచ్చే ఏడాది వరకు రిటైల్ ఎన్‌పీఏలు అధికం!
దిశ, వెబ్‌డెస్క్: ప్రస్తుత ఆర్థిక సంవత్సరంలో రిటైల్ నిరర్ధక ఆస్తులు(ఎన్‌పీఏ) అత్యధికంగా నమోదవ్వొచ్చని ప్రైవేట్ రంగ దిగ్గజం యాక్సిస్ బ్యాంక్ అభిప్రాయపడింది. 2021-22 ఆర్థిక సంవత్సరంలో తిరిగి కరోనా ముందునాటి స్థాయికి చేరుకోవచ్చని తెలిపింది. కొవిడ్-19 కారణంగా ఆర్థికవ్యవస్థ దారుణంగా ప్రభావితమైందని, అనేక సంస్థలు ఉద్యోగులను తొలగించడం, జీతాలను తగ్గించడంతో రిటైల్ రుణాల చెల్లింపుల సామర్థ్యం క్షీణించినట్టు యాక్సిస్ బ్యాంక్ రిటైల్ లోన్ హెడ్ సుమిత్ వివరించారు.
‘సెప్టెంబర్ నెల వరకు మారటోరియం అవకాశం ఉండటంతో ఎక్కువమంది ఆ వెసులుబాటును వినియోగించుకున్నారు.అక్టోబర్ నుంచి రుణాలను చెల్లించారు. కానీ, ఎక్కువమంది లోన్ రీస్ట్రక్చరింగ్ కోసం దరఖాస్తు చేసుకున్నారు. ఈ అవకాశం ఈ నెలాఖరుకు ముగియనుంది. ఆ తర్వాతే సంపూర్ణ వివరాలు స్పష్టమవుతాయని ఆయన పేర్కోన్నారు. ‘నెలవారీగా రుణాల చెల్లింపులు మెరుగ్గా ఉన్నాయి. అయితే, డిసెంబర్‌తో పాటు మార్చి త్రైమాసికాల్లో ఎన్‌పీఏలు అధికంగా నమోదయ్యే అవకాశాలున్నాయని, 2021 ఏప్రిల్ నెల తర్వాత సాధారణ స్థాయికి చేరుకోవచ్చని’ సుమిత్ వెల్లడించారు.
