ఎన్టీఆర్ ‘దేవర’ కోసం పూర్తిగా మారిపోయిన జాన్వీ కపూర్..
దిశ, సినిమా: టాలీవుడ్ యంగ్ టైగర్ ఎన్టీఆర్ హీరోగా, కొరటాల శివ దర్శకత్వంలో తెరకెక్కుతున్న చిత్రం ‘దేవర’. సముద్రం బ్యాక్‍డ్రాప్‍లో యాక్షన్ థ్రిల్లర్‌గా రూపొందుతున్న ఈ సినిమా రెండు బాగాలుగా రాబోతుంది. అయితే ఇందులో భాగంగా ఏప్రిల్ 5న రిలీజ్ కావాల్సింది. కానీ షూటింగ్, వీఎఫ్‍ఎక్స్ పనులు ఆలస్యం అవుతుండటంతో వాయిదా వేసింది మూవీ టీమ్. దీంతో దసరా సందర్భంగా అక్టోబర్ 10న ఈ చిత్రాన్ని రిలీజ్ చేస్తామని ప్రకటించింది. ఒకవేళ ‘పుష్ప 2’ వాయిదా పడితే ఆగస్టు 15న కూడా రిలీజ్ అయ్యే ఛాన్స్ ఉందని టాక్.
ఇదిలా ఉంటే ఈ మూవీలో తారక్ కు జోడీగా బాలీవుడ్ హీరోయిన్ జాన్వీ కపూర్ తెలుగులోకి ఎంట్రీ ఇస్తున్న విషయం తెలిసిందే. పల్లెటూరు అమ్మాయిగా లంగా వోణీ లో ఉన్న ఆమె లుక్ అదిరిపోయింది. అయితే తాజాగా ఈ ముద్దుగుమ్మ ఓ ఇంటర్వ్యూలో భాగంగా ‘దేవర’ మూవి గురించి ముచ్చటించింది.. ‘ తెలుగు డైలాగ్స్ చెప్పడం మొదలు పెట్టాను. ఎంత త్వరగా వీలైతే అంత త్వరగా వాటిని నేర్చుకోవాలని ఫిక్స్ అయ్యాను. రానున్న కొన్ని రోజుల్లో ఇకపై ఇంగ్లీష్ మాట్లాడకుండా.. కేవలం తెలుగులోనే మాట్లాడాలని నిర్ణయించుకున్నా. ఈ చిత్రంలో ఇంకా కొన్ని పాటల షూటింగ్ మిగిలి ఉంది’ అని జాన్వీ కపూర్ వెల్లడించింది.
