రైతుల్ని రాజుల్ని చేస్తామన్న వైసీపీ ఇప్పుడేం చేస్తోంది?

దిశ, డైనమిక్ బ్యూరో : రైతు బాగుంటేనే రాజ్యం బాగుంటుంది అంటూ ఎన్నికల ప్రచారంలో ఊదరగొట్టిన వైఎస్ఆర్ కాంగ్రెస్ పార్టీ తీరా అధికారంలోకి వచ్చిన తర్వాత అందుకు విరుద్ధంగా వ్యవహరిస్తోందని బీజేపీ రాష్ట్ర ప్రధాన కార్యదర్శి విష్ణువర్థన్ రెడ్డి ఆరోపించారు. రైతుల్ని రాజుల్ని చేస్తామన్న వైఎస్ఆర్ కాంగ్రెస్ పార్టీ ఇప్పుడు వారిని ఏం చేసినట్లు ? అని ప్రశ్నించారు. అకాల వర్షాలతో ఓ వైపు చేతికొచ్చిన పంటల్ని రైతులు కోల్పోతే.. మరో వైపు పండిన పంటను అమ్ముకోలేని దీనస్థితికి దిగజారిపోయారు అని ట్విటర్ వేదికగా ఆవేదన వ్యక్తం చేశారు. వైసీపీ పాలనలో రైతులకు నష్టం, బాధలు, కష్టాలకు ప్రభుత్వం ఎలా కారణమో ఆంధ్రప్రదేశ్ బీజేపీ పూర్తి స్థాయిలో చార్జిషీట్లు వేసి ప్రజల ముందు ఉంచుతుంది.. వారి కోసం పోరాడుతుంది అని బీజేపీ రాష్ట్ర ప్రధాన కార్యదర్శి విష్ణువర్థన్ రెడ్డి తెలిపారు.