బకింగ్‌హామ్ ప్యాలెస్ గేట్‌లపైకి దూసుకెళ్లిన కారు.. డ్రైవర్‌ అరెస్ట్

దిశ, నేషనల్ బ్యూరో: అత్యంత కట్టుదిట్టమైన భద్రత కలిగినటువంటి లండన్‌లోని బకింగ్‌హామ్ ప్యాలెస్ గేట్‌లపైకి ఇటీవల ఒక కారు దూసుకెళ్లింది. ఈ ఘటనలో కారు డ్రైవర్‌ను అరెస్ట్ చేసినట్లు పోలీసులు ఆదివారం తెలిపారు. శనివారం తెల్లవారుజామున రెండున్నర గంటల సమయంలో సెంట్రల్ లండన్‌లోని వెస్ట్‌మినిస్టర్‌లోని ప్యాలెస్ ప్రధాన గేట్‌లను ఒక కారు ఢీకొట్టిందని మెట్రోపాలిటన్ పోలీసులు తెలిపారు. కారు డ్రైవింగ్ చేసిన వ్యక్తిని అదుపులోకి తీసుకున్నారు. అతన్ని ఆసుపత్రికి తరలించారు. ఆ వ్యక్తికి ఎటువంటి గాయాలు కాలేదని అధికారులు పేర్కొన్నారు. ఈ ఘటన సమయంలో ప్యాలెస్‌లో ఎవరికీ హాని జరగలేదని, దెబ్బతిన్న గేట్లకు మరమ్మతులు జరుగుతున్నాయని వారు తెలిపారు. దీనిపై పూర్తి విచారణ జరుగుతుంది. బ్రిటీష్ రాజ కుటుంబం అధికారిక నివాసమైన బకింగ్‌హామ్ ప్యాలెస్‌లోకి ఇలాంటి చొరబాటు ఘటనలు గతంలో చాలా జరిగాయి. గత ఏడాది సెప్టెంబర్‌లో, 25 ఏళ్ల వ్యక్తి లోపలికి ప్రవేశించడానికి ప్రయత్నించి అరెస్ట్ అయ్యాడు.