మద్యం కొనలేదని ఎత్తుకెళ్లారు

దిశ, మానకొండూరు: తమ దగ్గర మద్యం కొనలేదని వైన్స్ షాపు యజమానులు బెల్టుషాపులపై దాడులు చేసి మద్యాన్ని ఎత్తుకెళ్లారు. ఈ ఘటన కరీంనగర్ జిల్లా తిమ్మాపూర్ మండలం పోరండ్లలో చోటుచేసుకుంది. గ్రామానికి చెందిన సదిరె సంపత్.. బెల్టు షాపు నిర్వహిస్తున్నాడు. నుస్తులాపూర్ వైన్స్ షాపులో ఒక్కో క్వార్టర్ కి పది రూపాయలు అధికంగా వసూలు చేస్తుండటంతో కరీంనగర్‌కు వెళ్లి మద్యం కొనుగోలు చేస్తున్నట్లు తెలిపాడు. అయితే తమ వద్ద మద్యం కొనుగోలు చేయకుండా బెల్టుషాపు ఎట్లా నిర్వహిస్తున్నావంటూ నుస్తులాపూర్ వైన్స్ నిర్వాహకులు తన ఇంట్లోని మద్యాన్ని ఎత్తుకెళ్లారని సంపత్ ఆవేదన వ్యక్తం చేశాడు. ఈ విషయం ఎవరికైనా చెబితే కేసు పెట్టి జైలుకు పంపుతామని బెదిరించినట్లు బాధితుడు ఆవేదన వ్యక్తం చేశాడు. ఈ ఘటనపై సంపత్ తిమ్మాపూర్ ఎక్సైజ్ పోలీసుల దృష్టికి తీసుకెళ్లాడు. ఎక్సైజ్ పోలీసుల జోక్యంతో మద్యాన్ని తిరిగి సంపత్‌కు అప్పగించారు.